Staršynstva Słavakii ŭ ES palepšyć adnosiny pamiž Minskam i Brusielem — pasoł
Staršynstva Słavackaj Respubliki ŭ Jeŭrasajuzie palepšyć adnosiny pamiž Minskam i Brusielem u cełym, a taksama pamiž Biełaruśsiu i Słavakijaj u pryvatnaści. Takoje mierkavańnie vykazaŭ BiełaPAN pasoł Słavakii ŭ Biełarusi Jozef Mihaš 25 červienia ŭ Minsku padčas «Vyšahradskaha piknika» — mierapryjemstva z nahody pačatku prezidenctva Polščy ŭ Vyšahradskaj hrupie i staršynstva Słavakii ŭ ES.
«My vielmi stanoŭča aceńvajem toje, jak paśla źniaćcia ŭ pačatku hoda sankcyj ź Biełarusi zapuściŭsia vielmi pazityŭny praces źmien, jakija zychodziać ad vašaha prezidenta i inšych kiraŭnikoŭ. Jany vyrazna i jasna pakazali namiery sumlennaha i raŭnacennaha dyjałohu — dyjałohu dla ahulnaj karyści, jak dla Brusiela, tak i dla Minska», — skazaŭ dypłamat.
«Dla vas heta važna, i vy robicie pastupovyja kroki da hetaha. Heta narmalna — nielha ŭsio adrazu zrabić, kali rabić chutka — možna nałamać droŭ. My adčuvajem, jak farmujecca novy kantekst adnosin Brusiela i Minska, a taksama Słavakii i Biełarusi paasobku», — dadaŭ słavacki pasoł.
Mihaš paviedamiŭ, što ŭvosień płanujecca vizit u Biełaruś pradstaŭničaj delehacyi Słavakii. Ciapier, pavodle jaho słoŭ, słavacki bok abmiarkoŭvaje kankretnyja prajekty, jakija jon moh by prapanavać Biełarusi ŭ halinie technałohij, finansaŭ, raźvićcia hramadzianskaj supolnaści, vizavaj palityki.
Jozef Mihaš padkreśliŭ, što Słavakija pieršapačatkova vystupała za źniaćcie sankcyj ź Biełarusi. «My byli ŭ avanhardzie tych krain ES, jakija kazali, što ich [sankcyi] treba admianiać. Ciapier usie razumiejuć, što heta było słušna. I Biełaruś nas nie padviała», — zajaviŭ słavacki dypłamat.
Jon taksama raskazaŭ, jak na cyrymonii ŭručeńnia davierčych hramat Alaksandr Łukašenka vykazaŭ nadzieju na toje, što Słavakija i nadalej budzie akazvać Biełarusi padtrymku i dapamohu. «Ja mahu skazać, što lidary našaj krainy da hetaha hatovyja», — zajaviŭ Jozef Mihaš.
Z 1 lipienia staršynstva ŭ Jeŭrasajuzie na paŭhoda pierachodzić na ratacyjnaj asnovie ad Niderłandaŭ da Słavakii. Zatym Słavakiju źmienić Malta.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary