Łukašenka źniaŭ namieśnika kiraŭnika Hienštaba. Toj byŭ uzornym słužakam i adnojčy vykazaŭsia pra hiejaŭ
«Hienierał-major Ihar Hłod vyzvaleny ad pasady namieśnika načalnika Hienieralnaha štaba Uzbrojenych Sił Respubliki Biełaruś pa bajavym kiravańni ŭ suviazi z uzrostam. Adpaviedny zahad Alaksandr Łukašenka padpisaŭ 27 červienia», — paviedamlaje BiełTA.
Pakul nieviadoma, chto zojmie vakantnuju vysokuju pasadu, jakuju Hłod atrymaŭ u 2008 hodzie.
Dahetul jon niekatory čas kiravaŭ bryhadami PDV u Breście i Viciebsku.
Viadoma ž, što jak čałaviek vajskovy, Ihar Hłod redka kazaŭ štości na publiku.
Sieciva pamiataje tolki takuju frazu, skazanuju im padčas razvažańnia pra hiejaŭ u vojsku.
«Narmalny mužyk pavinien z samalota na chadu vychodzić», — vykazaŭsia Hłod i dadaŭ, što nietradycyjnyja seksualnyja adnosiny ŭ vojsku nie vitajucca.
Taksama ŭ navinie cikavaja farmuloŭka, ź jakoj Hłoda źniali z pasady — «u zapas pa ŭzroście».
Viadoma, što ŭzrost — heta nie hałoŭny kryter dla Łukašenki padčas pryniaćcia kadravych rašeńniaŭ u siłavoj śfiery i ŭvohule.
Vydatny prykład — Leanid Malcaŭ, jaki naradziŭsia ŭ 1949 hodzie i ŭsio jašče zajmaje niemałuju pasadu staršyni Pahrankamiteta.
Tamu my pacikavilisia dumkami na hety kont u vajskovaha ekśpierta Alaksandra Alesina.
«Naŭrad ci hienierał patrapiŭ u apału, — skazaŭ Alesin «Našaj Nivie». — Mahčyma, heta stan zdaroŭja, a moža, i adukacyja Hłoda nie adpaviadaje sučasnym vyklikam — siońnia vajna inšaja, niama linii frontu, źmianilisia patrabavańni. Tamu ŭ kiraŭnika dziaržavy moža być inšaja asoba na prykmiecie, jakaja zdoleje spravicca z refarmavańniem vojskaŭ».
Taksama Alesin acharaktaryzvaŭ Hłoda jak uzornaha słužaku, jaki nie chapaŭ zorak ź nieba, ale prajšoŭ amal usiu słužbovuju leśvicu.
«Takaja ratacyja budzie praciahvacca i nadalej. Užo niepatrebnyja ludzi, jakija zajmajuć pasady i prosta vykonvajuć svaje abaviazki. Musiać źjaŭlacca novyja aficery, jakija razumiejuć sučasnyja vykliki i zdolnyja prynieści štości novaje i davieści reformy ŭ vojsku da rozumu», — dadaŭ taksama Alesin.
Na jahonuju dumku, novym namieśnikam kiraŭnika HŠ moža stać chtości z rehijanalnaha kamandavańnia.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary