Ankara: My na parozie vielmi važnych padziej u adnosinach z Rasijaj

U adnosinach Rasii i Turcyi adbyvajucca «vydatnyja pieramieny», zajaviŭ žurnalistam u paniadziełak premjer-ministr Turcyi Binali Iłdyrym.

Pavialičyć

«Narody Rasii i Turcyi chočuć, kab hety kryzis spyniŭsia, i ličać jaho biessensoŭnym», — skazaŭ kiraŭnik tureckaha ŭrada. «Naš abaviazak — adpaviadać pažadańniam naroda», — dadaŭ jon.

Adnosiny pamiž Maskvoj i Ankaroj rezka pahoršali ź listapada minułaha hoda, kali samalot Su-24 rasijskich VKS, jaki ŭdzielničaŭ u vajennaj apieracyi ŭ Siryi, byŭ źbity na siryjska-tureckaj miažy 24 listapada 2015 hoda tureckim źniščalnikam. Baki abmianialisia rezkimi zajavami, a zatym Rasija ŭviała suprać Turcyi i jaje hramadzian ekanamičnyja i vizavyja sankcyi.

U paniadziełak pres-sakratar Uładzimira Pucina Dźmitryj Piaskoŭ zajaviŭ, što Pucin atrymaŭ ad prezidenta Turcyi Redžepa Erdahana prabačeńni za hibiel rasijskaha piłota.

«Redžep Taip Erdahan vykazvaje svajo hłybokaje škadavańnie z nahody taho, što adbyłosia, i padkreślivaje hatoŭnaść rabić usio mahčymaje dla adnaŭleńnia tradycyjna družalubnych adnosin pamiž Turcyjaj i Rasijaj, a taksama sumiesna reahavać na kryzisnyja padziei ŭ rehijonie, zmahacca z teraryzmam», — zajaŭlajuć u Kramli.

Pradstaŭnik tureckaha prezidenta Ibrahim Kałyn u paniadziełak zajaviŭ, što krainy ŭžo damovilisia pačać sumiesnuju pracu. «My z zadavalnieńniem zajaŭlajem, što Rasija i Turcyja damovilisia pra toje, kab nieadkładna pryniać kroki dla palapšeńnia dvuchbakovych adnosin», — cytuje jaho ahienctva Rejter.

Padobnuju zajavu zrabiŭ ministr nacyjanalnaj abarony Turcyi Fikry Yšyk. «My na parozie vielmi važnych padziej u adnosinach z Rasijaj», — cytuje jaho TASS.

Jak paviedamlaje ahienctva Frans pres sa spasyłkaj na krynicu ŭ tureckim MZS, kiraŭnik viedamstva Mieŭlut Čavušahłu pa zaprašeńni rasijskaha boku voźmie ŭdzieł u pasiadžeńni rady ministraŭ zamiežnych spraŭ krain-siabroŭ Arhanizacyi čarnamorskaha ekanamičnaha supracoŭnictva. Zaprašeńnie Čavušahłu na forum paćvierdziła pradstaŭnik rasijskaha MZS Maryja Zacharava.

Navina pra toje, što adnosiny pamiž dźviuma krainami, mahčyma, pačynajuć naładžvacca, horača vitali ŭ rasijskim sajuzie turindustryi.

«My až zaviščali ŭsie ad radaści, tamu što abjektyŭna Turcyi vielmi nie chapaje na rasijskim rynku […] Usie turysty i ahienctvy vielmi pakutujuć ad adsutnaści ŭ asartymiencie prapanoŭ Turcyi. Pa suadnosinach košt-jakaść, uzroŭniu servisu nijakija inšyja kirunki Turcyju nie zamieniać. Raźličvajem, što ciapier budzie pryniataje niejkaje rašeńnie ŭ bok adkryćcia Turcyi», — skazała pradstaŭnik RST Iryna Ciuryna u intervju radyjostancyi «Hovorit Moskva».

Pa słovach Ciurynaj, paŭnavartasnyja čartarnyja prahramy ŭ Turcyju mahčyma adnavić za miesiac, «a pieršyja rejsy možna adpravić praz tydzień-dva».

• 0
• 0
• 0
• 0
• 0
• 0
• 0
• 0