U nastupnym hodzie biełaruskaja ekanomika budzie zastavacca ŭ recesii. Taki prahnoz Mižnarodnaha valutnaha fondu abviaściŭ na pres-kanfierencyi 30 červienia kiraŭnik misii fondu ŭ Biełarusi Piter Dołman.
«My čakajem, što recesija ŭ Biełarusi ŭ 2016—2017 hadach budzie zachoŭvacca», — adznačyŭ Dołman. Zhodna z acenkaj MVF, VUP krainy ŭ 2016 hodzie źnizicca na 3%, u 2017-m — na 0,5%.
Adkazvajučy na pytańnie BiełaPAN ab pryčynach takoha prahnozu, kiraŭnik misii MVF paviedamiŭ, što mahčymaści biełaruskaj ekanomiki mocna zaležać ad stanu i pierśpiektyŭ pracy siektara dziaržaŭnych pradpryjemstvaŭ.
«Asnoŭnaja zadača biełaruskaha ŭrada siońnia — stvareńnie ŭmoŭ dla ekanamičnaha rostu. Na hetym šlachu surjoznym vyklikam źjaŭlajecca siektar dziaržpradpryjemstvaŭ. My bačym, što dziaržpradpryjemstvy niasuć straty, im składana kankuravać, i tamu vyrašeńnie prablem dziaržsiektara źjaŭlajecca vielmi važnym pytańniem», — skazaŭ Dołman.
Dla refarmavańnia siektara dziaržpradpryjemstvaŭ spatrebicca niekalki hadoŭ, adznačyŭ jon.
«My ličym, što dla praviadzieńnia reformaŭ nieabchodna stvaryć sistemu sacyjalnaj padtrymki nasielnictva. Tym nie mienš my čakajem, što praces refarmavańnia dziaržsiektara budzie składanym, i tamu miarkujem, što recesija ŭ 2016—2017 hadach budzie zachoŭvacca», — skazaŭ Dołman.
Z 2018 hoda, zhodna z prahnozam MVF, pačniecca pavolnaje adnaŭleńnie ekanamičnaha rostu, abumoŭlenaje pastupovym palapšeńniem źniešnich umoŭ.
«U vypadku paśpiachovaha praviadzieńnia reformaŭ tempy ekanamičnaha rostu ŭ siarednieterminovaj pierśpiektyvie ŭ Biełarusi mohuć skłaści bolš za 4,5%», — skazaŭ Dołman.
Stała viadoma pra śmierć 22-hadovaha chłopca, jakoha asudzili pa palityčnaj kryminałcy2
Kamientary