Łukašenka: Biełaruś abaviazkova vyjdzie na novy, bolš vysoki ŭzrovień ekanomiki i jakaści žyćcia
Biełaruś abaviazkova vyjdzie na novy, bolš vysoki ŭzrovień ekanomiki i jakaści žyćcia. Pra heta Alaksandr Łukašenka zajaviŭ učora, vystupajučy na ŭračystym schodzie z nahody Dnia Niezaležnaści Biełarusi.
«Upeŭnieny, biełarusy pieraadolejuć i ciapierašnija, absalutna časovyja ciažkaści. My abaviazkova vyjdziem na novy, bolš vysoki ŭzrovień ekanomiki i jakaści žyćcia. Tamu što majem biascenny zdabytak — słaŭnuju historyju mužnaści i stojkaści, adzinstva naroda, pačućcio ŭłasnaj hodnaści, vialikaje žadańnie razam zrabić svaju radzimu mocnaj i kvitniejučaj», — zajaviŭ jon.
Łukašenka padkreśliŭ, što hałoŭnaja apora maładoj biełaruskaj dziaržavy — heta źjadnanaść jaje hramadzian i ich stvaralnaja praca.
Kiraŭnik dziaržavy nahadaŭ, što na V Usiebiełaruskim narodnym schodzie była pryniata prahrama dalejšaha raźvićcia krainy, i jaje vykanańnie zapatrabuje rašučych krokaŭ, u tym liku ŭ zakanadaŭstvie. «Tut vialikaja nadzieja na novy parłamient, vybary ŭ jaki projduć vosieńniu. Nikolki nie sumniavajusia, što biełarusy čarhovy raz prajaviać aktyŭnuju hramadzianskuju pazicyju i vysokuju śviadomaść. Pakolki novamu deputackamu korpusu daviadziecca prymać važnyja dla krainy rašeńni», — skazaŭ biełaruski lidar.
U bližejšyja hady, pradoŭžyŭ Alaksandr Łukašenka, nieabchodna skancentravać namahańni na pryjarytetnych napramkach: pryciahnieńni inviestycyj dla inavacyjnaha raźvićcia, zabieśpiačeńni pracoŭnaj zaniataści, pavieličeńni i dyviersifikacyi ekspartu, paskareńni i pašyreńni infarmatyzacyi, stvareńni ŭsich umoŭ dla harmaničnaha vychavańnia, adukacyi i prafiesijnaha rostu moładzi.
«Simvalična, što start hetaj vialikaj rabocie my dajom u Hod kultury. Pakolki sapraŭdnaja kultura — heta nie tolki falkłor, teatry, mastackija škoły, litaratura, kino i fiestyvali. Heta jašče i vysokatechnałahičnaja vytvorčaść, pravilnaje ziemlekarystańnie, bieražlivaje staŭleńnie da pryrody, pavaha da zakonu, šanavańnie svaich tradycyj. Narešcie, heta toj duchoŭny stryžań, jaki dapamoh našamu narodu vystajać u samych žorstkich vyprabavańniach», — upeŭnieny jon.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym6
Kamientary