Saviet AAN pa pravach čałavieka ŭchvaliŭ padaŭžeńnie mandata śpiecdakładčyka pa Biełarusi

Saviet AAN pa pravach čałavieka jašče na hod praciahnuŭ mandat śpiecyjalnaha dakładčyka AAN pa situacyi z pravami čałavieka ŭ Biełarusi. Adpaviednaje rašeńnie było pryniataje 1 lipienia na siesii SPČ AAN u Ženievie.Za rezalucyju ab praciahu mandata śpiecdakładčyka prahałasavali 15 krain — siabroŭ SPČ, suprać — 9, ustrymalisia — 23.

Vystupajučy pierad hałasavańniem, pradstaŭnik Niderłandaŭ, jakija ŭnieśli rezalucyju na razhlad SPČ ad imia Jeŭrasajuza, adznačyŭ, što ŭ dakumiencie adlustravanyja jak pazityŭnyja kroki, zroblenyja Biełaruśsiu, tak i prablemnyja momanty. U rezalucyi, jakaja hruntujecca na infarmacyi z papiarednich spravazdač śpiecdakładčyka pa Biełarusi, padkreślivajecca, što paśla vyzvaleńnia letaś palitviaźniaŭ inšych stanoŭčych źmienaŭ u śfiery pravoŭ čałavieka bolš nie było. Jak prykład isnujučych prablem pradstaŭnik Niderłandaŭ nazvaŭ składanaści z rehistracyjaj palityčnych partyj i hramadskich abjadnańniaŭ, a taksama zachavańnie śmiarotnaha pakarańnia ŭ Biełarusi. Akramia taho, jon zaklikaŭ biełaruskija ŭłady supracoŭničać sa śpiecdakładčykam.

U svaju čarhu pradstaŭnik Rasijskaj Fiederacyi zajaviŭ, što Rasija nie pryznavała i nie pryznaje mandat śpiecyjalnaha dakładčyka pa Biełarusi. «Štučnaje nahniatańnie napružanaści vakoł biełaruskaha siužetu jak siužetu, jaki patrabuje śpiecyjalnaj uvahi AAN da Biełarusi, nosić zakazny i palityzavany charaktar, — skazaŭ jon. — ES znoŭ jarka prajaviŭ dvajnyja standarty i niežadańnie razhladać pravaabarončyja siužety na raŭnapraŭnaj i ŭzajemapavažlivaj asnovie. Ź Biełaruśsiu byŭ abrany całkam inšy mietad — bieśpierśpiektyŭny mietad abvinavačvańnia i nacisku na suvierennuju dziaržavu».

Pradstaŭnik Rasii taksama zajaviŭ, što prapanavanaja rezalucyja źjaŭlajecca «absalutna nieprymalnaj sprobaj umiašańnia aŭtaraŭ rezalucyi ŭ vybarčyja pracesy ŭ krainie». «Palityčna matyvavanyja rezalucyja i mandat śpiecdakładčyka dyskredytujuć SPČ. Heta marnavańnie resursaŭ. Zaklikajem usich hałasavać suprać», — skazaŭ jon.

U svaju čarhu pradstaŭnica Šviejcaryi ad imia svajoj krainy, a taksama Aŭstralii, Isłandyi, Narviehii, Lichtenštejna, Novaj Ziełandyi zajaviła pra poŭnuju padtrymku pradaŭžeńnia mandata śpiecdakładčyka pa Biełarusi. Jana taksama padkreśliła, što nazvanyja krainy asudžajuć vykarystańnie śmiarotnaha pakarańnia ŭ Biełarusi. «Pierakananyja, što niama miesca śmiarotnamu pakarańniu ŭ cyvilizavanaj krainie, i chacieli b, kab farmuloŭki ŭ rezalucyi byli bolš žorstkimi z nahody niedapuščalnaści hetaha vidu pakarańnia», — skazała jana.

Kiraŭnik pastajannaha pradstaŭnictva Biełarusi pry AAN u Ženievie Juryj Ambrazievič adznačyŭ: «Na fonie humanitarnych kryzisaŭ, vojnaŭ, teraryzmu i halečy, jakija realna pahražajuć sučasnamu śvietu i zabirajuć tysiačy žyćciaŭ, Biełaruś nie ličyć, što situacyja ŭ našaj krainie zasłuhoŭvaje asablivaj uvahi savieta. My škadujem, što AAN u čarhovy raz robicca prychilnikam palityčnych roznahałośsiaŭ pamiž susiedziami, adzinym rašeńniem jakich źjaŭlajecca dvuchbakovy dyjałoh. My viadziem takija dyjałohi z aŭtarami rezalucyi. I znoŭ vykazvajem nierazumieńnie ich pazicyi pa vyniasieńni ŭ rezalucyju pytańniaŭ, jakija razhladajucca ŭ dvuchbakovym paradku».

Pavodle jaho słoŭ, biełaruskija dziaržava i hramadstva nie majuć patreby ŭ savietach śpiecdakładčyka. «My z samaha pačatku adkryta zajaŭlali pra heta. My nie prymajem arhumienty suaŭtaraŭ rezalucyi i zaklikajem členaŭ savieta hałasavać suprać», — skazaŭ Ambrazievič.

Pradstaŭnik Kuby, jaki ŭziaŭ słova zatym, zajaviŭ, što jaho kraina vystupaje suprać pryniaćcia rezalucyj pa palityčnych matyvach. «My zaklikajem Biełaruś pa-raniejšamu abaraniać niezaležnaść svajoj krainy i adstojvać prava na samavyznačeńnie. Hetaja rezalucyja — prykład padvojnych standartaŭ. Nie padtrymlivajem mandat. Budziem hałasavać suprać», — adznačyŭ jon.

Pradstaŭnik Kitaja zajaviŭ, što jaho kraina vystupaje suprać vykarystańnia SPČ jak instrumienta manipulavańnia. «Heta nie viadzie da ŭrehulavańnia prablem, — adznačyŭ jon. — Prajekt hetaj rezalucyi nijak nie aśviatlaje pazityŭnyja kroki i prahres Biełarusi ŭ halinie pravoŭ čałavieka i ŭjaŭlaje saboj sprobu palityzacyi, padvojnych standartaŭ i vybiralnaści. My budziem hałasavać suprać».

Pradstaŭnik Vieniesueły padkreśliŭ, što hetaja rezalucyja parušaje «pryncypy zachavańnia suvierenitetu i nieŭmiašańnia va ŭnutranyja spravy dziaržavy». «Nie pryznajem padobnyja mandaty, jakija zaklikanyja zadavolić karyślivyja intaresy tolki niekatorych bakoŭ. Biełaruś całkam supracoŭničaje z SPČ i dzielicca svaimi pośpiechami», — skazaŭ jon.

Pradstaŭnica Batsvany skazała, što jaje kraina całkam padtrymlivaje dziejnaść śpiecdakładčyka i rezalucyju, hruntujučysia na tym, što «jość patreba ŭ vyrašeńni prablem z pravami čałavieka» i spynieńni «pakut biełaruskaha naroda». U papiarednija hady Batsvana hałasavała za rezalucyi ab praciahu mandata śpiecdakładčyka, ale sioleta ŭstrymajecca z-za najaŭnaści ŭ rezalucyi punkta ab asudžeńni śmiarotnaha pakarańnia ŭ Biełarusi i zakliku da jaje admieny. Jak patłumačyła pradstaŭnica Batsvany, u jaje krainie taksama ŭžyvajecca śmiarotnaje pakarańnie i, u vypadku padtrymki rezalucyi z asudžeńniem hetaj miery pakarańnia, u batsvanskaha boku jość aściarohi, što da jaho taksama vystaviać pretenzii z hetaj nahody.

Pradstaŭnik Mieksiki adznačyŭ, što ciapierašniaja rezalucyja źjaŭlajecca bolš zbałansavanaj, čym u papiarednija hady, bo ŭ joj adznačajecca supracoŭnictva Biełarusi z ABSIE i ŭdzieł krainy ŭ miechanizmach pravaabarončaha charaktaru AAN, u tym liku Univiersalnym pieryjadyčnym ahladzie. «Zaklikajem Biełaruś praciahvać hetaje supracoŭnictva, — skazaŭ jon. — Vykazvajem svaju zakłapočanaść u suviazi z prablemami z pravami čałavieka ŭ Biełarusi, u tym liku abmiežavańniem svabody słova, dziejnaści pravaabaroncaŭ i hramadskich arhanizacyj, prymianieńniem śmiarotnaj kary. Budziem hałasavać za pryniaćcie rezalucyi».

U rezalucyi vykazanaja zaniepakojenaść z nahody situacyi z pravami čałavieka ŭ Biełarusi, vykarystańnia katavańniaŭ i žorstkaha abychodžańnia ŭ miescach pazbaŭleńnia voli, adsutnaści adkazu ŭrada pa faktach hvałtoŭnaha źniknieńnia apazicyjnych palitykaŭ, biespakaranaści vinavatych u parušeńniach pravoŭ čałavieka. Taksama vykazvajecca zaniepakojenaść u suviazi z parušeńniami pravoŭ pracoŭnych, naciskam na pravaabaroncaŭ i adsutnaściu apazicyi ŭ parłamiencie. Akramia taho, u dakumiencie źviartajecca ŭvaha na fakty prymianieńnia śmiarotnaha pakarańnia ŭ Biełarusi i niedachop infarmacyi pra kolkaść pakaranych ludziej.

Mandat śpiecyjalnaha dakładčyka pa situacyi z pravami čałavieka ŭ Biełarusi byŭ zasnavany Savietam pa pravach čałavieka AAN u lipieni 2012 hoda, a zatym štohod pradaŭžaŭsia, niahledziačy na niehatyŭnuju reakcyju biełaruskich uładaŭ. Uvieś hety čas aficyjny Minsk admaŭlajecca ad supracoŭnictva sa śpiecdakładčykam Mikłašam Charaści, bo ličyć prablemu z pravami čałavieka ŭ Biełarusi nadumanaj.

Napiaredadni adkryćcia ciapierašniaj siesii SPČ biełaruskija i mižnarodnyja pravaabaroncy zaklikali AAN pradoŭžyć mandat śpiecdakładčyka pa Biełarusi. Pavodle ich acenki, «charaktar biełaruskaha režymu, što znachodzicca va ŭładzie amal 22 hady, nie źmianiŭsia».

• 0
• 0
• 0
• 0
• 0
• 0
• 0
• 0