Budsłaŭski fest: papski lehat pieradaŭ biełaruskim hreka-katolikam relikviju sv. Jazafata Kunceviča
«Razam z Maryjaj my siońnia dziakujem Bohu za siarebrany jubilej adradžeńnia struktur Katalickaha Kaścioła ŭ Biełarusi», — skazaŭ na śviatoj Imšy ŭ noč z 1 na 2 lipienia padčas uračystaściaŭ u Nacyjanalnym sanktuaryi ŭ Budsłavie Mitrapalit Minska-Mahiloŭski arcybiskup Tadevuš Kandrusievič.
U Eŭcharystyi ŭdzielničaŭ śpiecyjalny pasłańnik Papy Franciška arcybiskup Vieny kardynał Krystaf Šonbarn OR, jaki padčas jaje pieradaŭ biełaruskim hreka-katolikam relikviju śviatoha Jazafata Kunceviča.
Imšy papiaredničała vieličnaja pracesija z kopijaj abraza Maci Božaj Budsłaŭskaj.
Dapamožny biskup Minska-Mahiloŭskaj archidyjacezii Alaksandr Jašeŭski SDB ahučyŭ na Imšy list Papy Franciška da lehata na ŭračystaści ŭ Budsłavie kardynała Krystafa Šonbarna i pryvitalnaje słova novaha Apostalskaha Nuncyja ŭ Biełarusi mansieńjora Habara Pintera.
«My supravadžajem Ciabie, dastojny naš brat, u Tvajoj misii vykanańnia hetaha zadańnia. Urešcie z radaściu ŭdzialajem Tabie Našaje Apostalskaje błahasłaŭleńnie, znak našaj dobrazyčlivaści da Ciabie i niabiesnaha daru; pieradaj ža jaho ŭsim udzielnikam celebracyi», — havorycca ŭ liście Papy da kardynała Krystafa Šonbarna.
«Kali vy siońnia sabralisia ŭ Nacyjanalnym sanktuaryi Božaj Maci, kab z radaściu i nadziejaj pahladzieć na 25 hadoŭ padaravanaj Boham historyi Minska-Mahiloŭskaj mitrapolii i dziakavać za ich, ja prašu kožnaha z vas asablivym čynam malicca za našaha Śviatoha Ajca Franciška, za ŭsiu našu krainu Biełaruś, ab šmatlikich i śviatych paklikańniach da śviatarstva i manaskaha žyćcia, za šmatlikija dobryja chryścijanskija siemji», — adznačajecca ŭ słovie novaha Apostalskaha Nuncyja ŭ Biełarusi.
«U ciažkija časy hanieńniaŭ na vieru naš narod davieryŭsia Maryi, i siońnia naša Apiakunka — Božaja Maci Budsłaŭskaja — u pracesii pryviała da ałtara, kab na im skłasci eŭcharystyčnuju achviaru padziaki za svabodu vieravyznańnia i dar adradžeńnia viery, pieraprasić za nie da kanca vykarystanyja mahčymasci, jakija nam daje Božy Provid, i taksama prasić błahasłaŭleńnia na budučyniu», — skazaŭ u hamilii Mitrapalit Tadevuš Kandrusievič.
«Siońnia my dziakujem Bohu za dar chryścijanskaj viery. Bolš za tysiaču hadoŭ u časy spryjalnych dla jaje roskvitu i časy hanieńniaŭ jana apładniała našu ziamlu i praciahvaje heta rabić, na fundamiencie Jevanhiella tvoračy novy Božy narod. Dziakujučy chryścijanstvu Biełaruś nie źjaŭlajecca krainaj, dzie palacca vohniščy nianaviści i adbyvajucca relihijnyja vojny», — źviarnuŭ uvahu arcypastyr.
Pa słovach ijerarcha, «schilajučy hałovy pierad tymi, chto baraniŭ vieru i jaje adradžaŭ, my, ich naščadki, pavinny zastavacca viernymi svajoj chryścijanskaj spadčynie, bo jana — naš vyprabavany stahodździami padmurak dla ščaślivaj budučyni».
Mitrapalit dadaŭ, što historyja chryscijanstva i Kaścioła na biełaruskaj ziamli —«dobry ŭrok na budučyniu, što z Božaj dapamohaj my možam dasiahnuć vialikich rečaŭ, kali tolki budziem žyć zhodna z chryscijanskimi kaštoŭnaściami».
Arcybiskup źviarnuŭ uvahu, što chryscijanskaja cyvilizacyja biełaruskaha naroda «nie źjaŭlajecca čymści skamianiełym, jana patrabuje razvićcia, patrabuje nie tolki tradycyi i ŭkrytych u ziamli karanioŭ hetaha šmatviakovaha dreva našaj viery, ale taksama novych maładych zialonych halinak i liściaŭ». Taksama, pa słovach Mitrapalita, treba pamiatać, što «chryscijanstva źjaŭlajecca patrabujučym»: «heta pastajannaja baraćba praŭdy z falšam, dabra sa złom, pryhažosci z brydotaj, etyki z hrachom, svabody sa źnievalnieńniem, kaštoŭnaściaŭ z antykaštoŭnaściami, sensu ź biessensoŭnaściu, žyćcia sa śmierciu, isnavańnia ź niebyćciom».
«Kab u hetaj baraćbie pieramahčy, niedastatkova tolki vieryć u Boha. Treba jašče zastavacca viernym Jamu. Heta aznačaje, što nie moža być supiarečnasci pamiž tym, u što my vierym, i tym, jak žyviom», — patłumačyŭ ijerarch.
Mitrapalit dadaŭ, što viernaść chryscijanskim karaniam «nie aznačaje miechaničnaha kapijavańnia prykładaŭ z minułaha»: «jana pavinna być tvorčaj, hatovaj adpłysci na hłybiniu, adkrytaj na novyja vykliki, čułaj da znakaŭ času». «Prajaŭlajecca jana taksama i ŭ kłopacie ab razvicci rodnaj kultury, u jakoj užo dziesiać stahodździaŭ prysutničaje chryscijanski elemient. Viernaść karaniam aznačaje i ŭmieńnie budavać suviaź pamiž histaryčnyimi kaštoŭnaściami, jakija byli vyprabavany časam, i vyklikami sučasnasci, pamiž vieraj i kulturaj, Jevanhiellem i žyćciom, — jak kaža sv. Jan Pavieł II», — zaŭvažyŭ arcybiskup.
«Hetuju tvorčuju viernaść čałaviek sam biez Božaj dapamohi nie moža pieradać inšym. Maryja pryniała Božuju volu, zastałasia joj viernaj, pieradała ludziam svajho času i pieradaje nam. Jak Maci Miłasernasci, Jana zaŭsiody kłapocicca pra nas i nikoli nie pakidaje adnych z našymi prablemami, — skazaŭ ijerarch. — Maryja, jak Maci Miłasernasci, zaŭsiody z nami, kab dać nam nadzieju, navat nasupierak nadziei».
«Maci Božaja Budsłaŭskaja, Ty ŭžo bolš za čatyrysta hadoŭ baroniš nas i viadzieš da Tvajho Syna, u Jubilejny Hod Božaj Miłasernasci i ŭ jubilej 25-hodździa adradžeńnia struktur Katalickaha Kaścioła ŭ Biełarusi Tabie daviarajem naš los. Vyprasi ŭ svajho Syna łasku zaŭsiody zastavacca viernymi našamu chryscijanskamu paklikańniu, być jaho śviedkami i baranić duchoŭnyja kaštoŭnasci, jakimi Boh nas adorvaje ŭ adrodžanym Kaściole», — z hetymi słovami źviarnuŭsia arcybiskup Tadevuš Kandrusievič da Panny Maryi.
Padčas Imšy papski pasłańnik kardynał Krystaf Šonbarn pieradaŭ biełaruskim hreka-katolikam relikviju sv. Jazafata Kunceviča — nabiedranik, častku jaho arcybiskupskaha adzieńnia.
«Atrymać kaštoŭnuju relikviju, nabiedranik — znak archipastyrskaha słužeńnia sv. Jazafata — dla nas duchoŭnaje ŭmacavańnie ŭ našaj viery i viernaści Rymskamu Apostalskamu Pasadu, zaachvočvańnie da ruplivaha śviedčańnia Jevanhiella», — adznačyŭ Apostalski vizitatar dla hreka-katolikaŭ Biełarusi archimandryt Siarhiej Hajek.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym5
Kamientary