Adzin ź fihurantaŭ pa «spravie hraficistaŭ» Viačasłaŭ Kasinieraŭ, jaki chacieŭ pryciahnuć da kryminalnaj adkaznaści asob, što mocna źbili jaho pry zatrymańni 11 žniŭnia minułaha hoda, u čarhovy raz atrymaŭ adkaz z Maskoŭskaha rajadździeła Śledčaha kamiteta horada Minska ab prypynieńni kryminalnaj spravy.
«U suviazi ź nieŭstanaŭleńniem asoby, jakaja padlahaje pryciahnieńniu da kryminalnaj adkaznaści, sprava pa prykmietam składu złačynstva, praduhledžanaha častkaj 1 artykuła 149 KK RB prypyniajecca».
Razam z tym paviedamlajecca, što «pa kryminalnaj spravie praciahvajuć pravodzicca apieratyŭna – vyšukovyja mierapryjemstvy apieratyŭnymi słužbami ŭnutranych spraŭ. U vypadku ŭstanaŭleńnia asoby jakaja ździeśniła złačynstva, vam budzie paviedamlena dadatkova».
Kryminalnaja sprava pa fakcie naniasieńnia Viačasłavu Kasinieravu cialesnych paškodžańniaŭ pry žorstkim zatrymańni supracoŭnikami śpiecyjalnaha atrada chutkaha reahavańnia ŭnutrannych vojskaŭ MUS (SACHR) była ŭzbudžanaja jašče naprykancy listapada 2015 hoda.
Z taho času papiaredniaje rasśledavańnie niekalki razoŭ prypyniałasia Śledčym kamitetam. Śledčyja śćviardžajuć, što vinavatych u źbićci aktyvista jany ŭstanavić nia mohuć. Albo nie žadajuć, robiačy pry hetym vyhlad, što staranna pravodziać rasśledavańnie ŭ ramkach kryminalnaj spravy?
