Arhanizatary XXVII Festyvalu muzyki maładoj Biełarusi ahučyli poŭny śpis haściej i čas ich vystupaŭ, a taksama raspaviali, čym, akramia zasiarodžanaha słuchańnia melodyj i šalonych skokaŭ pad bity, možna budzie zaniacca na sioletnim «Basoviščy».
Dvaccać siomy hod zapar «Basovišča» vabić amataraŭ niezaležnaj biełaruskaj muzyki ŭ Boryk, što pad Haradkom la Biełastoku. Sioleta dva festyvalnyja dni prypali na 22-ha i 23-ha lipienia. Tradycyjna ŭvachod na terytoryju festu volny, a łajn-ap nasyčany i raznastajny.
«Kali my planavali prahramu, to imknulisia zaprasić i zorak biełaruskaj muzyki, i maładych vykanaŭcaŭ. Tamu dla nas vielmi važny Konkurs maładych hurtoŭ. My hanarymsia ŭzroŭniem sioletniaha Konkursu i čakajem finału 22-ha lipienia, bo na prykładzie letašnich laŭreataŭ — Navi i TonqiXod — bačym, jak našyja pieramožcy raźvivajucca. Sioleta intryha na Konkursie vieličeznaja i my sami nie biaremsia prahnazavać jaho vyniki. The Glitchhh, .K, Intelligency, M.G. — usie kankursanty mocnyja i kankurencyja budzie nadzvyčajnaj! — zaznačaje arhanizatarka «Basovišča» Hanna Piakarskaja. — Asnoŭnaja festyvalnaja prahrama — heta niezvyčajnaje spałučeńnie roznych pa styli i hučańni hurtoŭ. My admysłova skłali paradak vystupaŭ tak, kab možna było pahladzieć na muzykaŭ z trošku niazvykłaha rakursu. Spadziajusia, naviednikam festu pryjdziecca heta daspadoby. Kali ščyra, kab była mahčymaść, ja b i sama nie sychodziła z tancplacu ŭsie dva dni!»
Chedłajnerami u pieršy festyvalny dzień stanuć partyzany biełaruskaha roku — hurt «Krambambula» na čale ź Lavonam Volskim, a ŭ druhi dzień — hurt Brutto. Siarod zamiežnych haściej — serbski prajekt Erik, polski hurt Jazzombie dy Gogodzy Ganski z Ukrainy, a taksama padlašskija hurty Ilo&Friends i Zero-85. A jašče hości «Basovišča» stanuć śviedkami muzyčnaha eksperymentu: spačatku polski hurt Hańba! i biełaruskaja kamanda Dzijeciuki zajhrajuć svaje sety, a paśla abjadnajucca ŭ pank-farmacyju Hańbuki, kab jašče hadzinu zapalvać tancplac. I, viadoma, słuchačoŭ čakajuć vystupy hurtoŭ Re1ikt, :B:N: dy inšych vybitnych biełaruskich kamand!
Pazamuzyčnyja aktyŭnaści na festyvali taksama buduć. U subotu arhanizatary zaprašajuć pravieści hadzinu ź «Biełaruskaj animacyjaj» na kinapakazie, pasprabavać svaje siły na spartyŭnych spabornictvach dy dałučycca da teatralnych varštataŭ. Asia Stelmašuk i teatar «Czrevo» pradstaviać pastanoŭku «Ksenia» na padlašskaj movie, a niamieckija žurnalisty prezentujuć dakumentalny film, stvorany na letašnim «Basoviščy».
Jak zaŭsiody, niepadalok ad sceny źmieścicca namiotavaje miastečka, miesca ŭ jakim kaštavaćmie 30 PLN z asoby. Na terytoryi «Basovišča» pracavaćmuć stendy ź biełaruskaj vopratkaj, knihami, studyja tatu i barberšop.
Kamientary