Viadučy BT publikuje fota z vysunutym jazykom i ŭśmieškaj pad tekstam pra terakt u Nicy. Dzianis Kurjan u kamientarach: «Navošta?»
Viadučy «Dobraj ranicy Biełaruś» Jaŭhien Pierlin siońnia ranicaj apublikavaŭ u svaim instahramie fota, dzie z uśmieškaj pakazvaje svajoj suviadučaj jazyk — taja taksama śmiajecca.
«Padziei ŭ Nicy nie dajuć spakoju», — napisaŭ pad fota Pierlin, majučy na ŭvazie žudasny terakt, jaki zabraŭ žyćci 84 čałaviek.
Taksama Jaŭhien dadaŭ da fota tehi, siarod ich #morning #show #priamojefir #vieduŝij #JevhienijPierlin #šoumien #Pierlin #prayfornice — apošni značyć smutak pa zahinułych i pierakładajecca jak «malusia za Nicu».
Takoje fota i supravadžalny tekst da jaho vyklikała abureńnie ŭ niekatorych kamientaraŭ.
«Ženia, daruj, ale pa-mojmu viasiołaje fota i tekst nie zusim adpaviadajuć adzin adnamu. Navošta fota ludziej, što viesialacca, i taki podpis?», — pytajecca ŭ kalehi viadučy Dzianis Kurjan.
«Absalutna zhodnaja ź Dzianisam, — dadaje supracoŭnica Wargaming. — Viasiołaje fota i kamientar pra žudasnyja padziei — nie lepšy šlach zajavić pra svaje ŭnutranyja chvalavańni».
«Navošta ŭvohule pisać pra terakt? Pieršy raz baču viasiołaje fota z padobnym tekstam», — napisała jašče adna dziaŭčyna.
U adkaz Pierlin patłumačyŭ, što «možna doŭha spračacca, jakim maje być ranišniaje šou u takich vypadkach, ale Nica nie adnosicca da «pieršaha koła łakalnaści», tamu efir — heta efir, a astatniaje ŭ mianie ŭnutry».
Taksama viadučy napisaŭ, što tekst pad fota supadaje z padtekstam.
Kamientary