Niebiaśpiečnaja zdabyča. Francuzskija rybaki złavili partuhalskuju padvodnuju łodku
Partuhalskaja submaryna Tridente, jakaja brała ŭdzieł u vučeńniach niedaloka ad paŭdniovaha ŭźbiarežža Vialikabrytanii, 12 lipienia trapiła ŭ sieci francuzskaha rybałoŭnaha siejniera Daytona, paviedamiła Bi-bi-si
Bajavy karabiel znachodziŭsia pad vadoj, kali sutyknuŭsia ź sieciami, ale incydent byŭ biaskryŭdnym — nichto nie byŭ paranieny, abodva karabli taksama nie byli paškodžanyja.
Sučasny marski pramysłovy łoŭ ryby idzie z vykarystańniem vielmi tryvałych sietak, jakija sudna ciahnie za saboj mahutnymi kanatami. Hetyja kanaty praktyčna nie adroźnivajucca pa taŭščyni ad buksirnych — tamu padłodka, patrapiŭšy ŭ nierat, moža prosta paciahnuć za saboj rybałoŭnaje sudna. Byli vypadki, kali heta pryvodziła da paškodžańniaŭ i łodki, i sudna.
Padvodnaja łodka adrazu padniałasia na pavierchniu i naładziła suviaź z francuzskimi sudami. Rybaki vyzvalili sietku z dapamohaj brytanskich marskich ratavalnikaŭ i pajšli ŭ bok Francyi.
U 2004 hodzie piać rybakoŭ zahinuli, kali francuzskaje sudna Bugaled Breizh patanuła ŭ hetym ža rajonie. Siemji zahinuŭšych zajaŭlali, što pryčynaj stała padłodka, jakaja trapiła ŭ sietki i zaciahnuła sudna pad vodu, adnak sud vyrašyŭ, što dokazaŭ hetaha niama.
Kamientary