Žyllo ŭ Minsku daražeje druhi miesiac zapar, kvadratny mietr vyras da $1100
Pavyšanaja aktyŭnaść pakupnikoŭ žylla, jakuju šmat chto nazyvaje «chapunom», praciahvaje naziracca i z nadychodam leta. Try apošnija miesiacy ŭ Minsku rehistrujuć bolš za 1300 uhodaŭ kupli-prodažu kvater, pry siarednim uzroŭni ŭ 900—1000 abjektaŭ. Ad praźmiernaści prapanovy, jakaja nazirałasia jašče ŭ pačatku viasny, nie zastałosia i śledu.
U červieni ŭ paraŭnańni z traŭniem kolkaść uhodaŭ pavialičyłasia na 1%. Zrešty, tut treba adznačyć, što ŭ červieni było na 2 pracoŭnyja dni bolš. U cełym, II kvartał 2016 hoda akazaŭsia samym vynikovym za apošnija 10 hadoŭ. U paraŭnańni z anałahičnym pieryjadam minułaha hoda kolkaść ździełak vyrasła na 37% i heta pry tym, što hod tamu aktyŭnaść pakupnikoŭ nielha było nazvać nizkaj. Možna skazać, što za try apošnija miesiacy praviali 4-miesiačnuju normu ŭhodaŭ.
Naturalnaje śledstva pavyšanaha popytu — heta imklivaje vymyvańnie prapanovy. U červieni kolkaść vystaŭlenych na prodaž kvater skaraciłasia na 6,4%, a ŭsiaho za apošnija 4 miesiacy «usychańnie» prapanovy skłała krychu mienš za 30%.
Adnosiny pradadzienych kvater da vystaŭlenych na prodaž pa vynikach červienia skłała 1 da 5. Pry takoj praporcyi, jak praviła, nazirajecca pavolny rost koštaŭ.
U traŭni my stali śviedkami pieršaha rostu siaredniaj ceny ździełak ŭ 2016 hodzie. Na fonie rezkaha skaračeńnia prapanovy asnoŭnyja ačahi pakupnickaj aktyŭnaści ssoŭvalisia ŭ bolš vysokija cenavyja dyjapazony, dzie było bolš mahčymaściaŭ dla vybaru.
Červieńskaja dynamika popytu i prapanovy spryjała tamu, kab hetaja tendencyja atrymała praciah. Bolš za toje, pavialičylisia tempy rostu koštaŭ.
Siaredniaja cana kvater, raźličanaja pa dadzienych realnych ździełak, vyrasła ŭ červieni na 1,5% i dasiahnuła adznaki ŭ 1105 $/m2.
U zaležnaści ad kolkaści pakojaŭ situacyja była nastupnaj (+ absalutnyja ceny):
· 1-pakajovyja kvatery: 1166$/m2 (+2,5% za miesiac) — $ 41 400;
· 2-pakajovyja kvatery: 1077$/m2 (+0,5%) — $ 52 000;
· 3-pakajovyja kvatery: 1045$/m2 (+0,5%) — $ 69 400;
· 4-pakajovyja kvatery: 1013$/m2 (+0,9%) — $ 80 150.
Taki nievialiki razryŭ pamiž siarednimi koštami ŭhodaŭ i prapanovy ŭ apošni raz naziraŭsia ŭ śniežni 2014 hoda — samym pačatku praciahłaha źnižeńnia koštaŭ.
Z nadychodam leta mnohija pradaŭcy kvater naohuł pierastali karektavać košty ŭ abjavach u bok panižeńnia. Novyja abjekty, jakija tolki vychodziać na rynak, čaściakom majuć bolš vysokuju canu, čym tyja, jakija znachodziacca ŭ prodažy ŭžo niekalki miesiacaŭ.
Vielmi vysoki popyt u apošnija miesiacy aznačaje, što žyllovaje pytańnie vyrašyli nie tolki tyja, kamu heta treba było zrabić «siońnia», ale i častka tych, kamu hetaje pytańnie treba było vyrašyć «zaŭtra». I kali heta «zaŭtra» nastupić, biahučaja hipieraktyŭnaść jašče adhukniecca deficytam pakupnikoŭ.
Kamientary