Biełaruskija žančyny — u dziasiatcy samych vysokich u śviecie

Kali sprava dachodzić da rostu, to nad usimi žycharami płaniety ŭzvyšajucca hałandskija mužčyny i žančyny z Łatvii. Pavodle vynikaŭ daśledavańnia, apublikavanaha ŭ časopisie eLife, rost siaredniaha mužčyny ŭ Hałandyi dasiahaje 183 santymietraŭ, a siaredniaj žančyny ŭ Łatvii - 170 sm.

Daśledčyki vyvučali źmieny ŭ siarednim roście ŭ 187 krainach za apošnija 100 hadoŭ.

Pavialičyć

Śpis krain z najbolš vysakarosłymi žančynami (u dužkach miesca ŭ śpisie za 1914 h.). Biełaruski ŭ novym śpisie na 9-m miescy.

1. Łatvija (28)
2. Niderłandy (38)
3. Estonija (16)
4. Čechija (69)
5. Sierbija (93)
6. Słavakija (26)
7. Danija (11)
8. Litva (41)
9. Biełaruś (42-je miesca ŭ 1914 h.)
10. Ukraina (43)

Śpis krain z najbolš vysakarosłymi mužčynami (u dužkach miesca ŭ śpisie za 1914 h.):

1. Niderłandy (12)
2. Bielhija (33)
3. Estonija (4)
4. Łatvija (13)
5. Danija (9)
6. Bośnija i Hiercahavina (19)
7. Charvatyja (22)
8. Sierbija (30)
9. Isłandyja (6)
10. Čechija (24).

Biełaruskija mužčyny ŭ hetym śpisie zajmajuć 22-je miesca, pamiž Ukrainaj i Šviejcaryjaj.

Častku roźnicy ŭ siarednim roście ŭ roznych krainach možna rastłumačyć hienietyčnymi faktarami, ale aŭtary dakłada dadajuć, što sprava nie tolki ŭ hienietycy.

***

Madžyd Ezaci, taksama ź Impierskaha kaledža, skazaŭ u intervju Bi-bi-si: «Hienietyka moža vyznačyć prykładna tracinu vynikaŭ, ale jana nie tłumačyć źmianieńniaŭ u roście pamiž pakaleńniami. Hieny tak chutka nie mianiajucca, i va ŭsim śviecie jany prykładna adnolkavyja. Adpaviedna, źmieny ŭ roście ź ciaham času, a taksama roźnicu ŭ siarednim roście pamiž roznymi krainami možna rastłumačyć tolki upłyvam navakolnaha asiarodździa. Havorka idzie, viadoma, ab cełych papulacyjach, a nie asobnych indyvidaŭ».

Palapšeńni ŭ sistemie achovy zdaroŭja, sanitarnym kantroli i charčavańni zastajucca asnoŭnymi faktarami, kaža jon.

Inšyja daśledavańni pakazvajuć na toje, što vysoki rost pryvodzić jak da stanoŭčych, tak i da admoŭnych nastupstvaŭ.

U ludziej vysokaha rostu bolšaja praciahłaść žyćcia, i ŭ ich mienš šancaŭ raźvićcia chvarob sardečna-sasudzistaj sistemy. Ź inšaha boku, jość ukazańni na toje, što ŭ ich bolšy šaniec zachvareć niekatorymi vidami raku, naprykład, na rak pramoj kiški, a taksama na rak hrudziej i jaječnikaŭ.

• 0
• 0
• 0
• 0
• 0