Pavodle vynikaŭ narady ab dziejnaści orhanaŭ pamiežsłužby 26 lipienia Alaksandr Łukašenka daručyŭ udaskanalić pracu pamiežnaj słužby z ulikam niedachopaŭ, vyjaŭlenych pa asobnych kirunkach.
Jak paviedamlaje pres-słužba kiraŭnika dziaržavy, niadaŭna pavodle daručeńnia Łukašenki była praviedzienaja raptoŭnaja pravierka dziejnaści orhanaŭ pamiežsłužby, i mienavita jaje vyniki źjavilisia pradmietam abmierkavańnia na naradzie. «Mianie prainfarmavali pra vyniki hetaj raptoŭnaj pravierki. Było niekalki mierkavańniaŭ. Treba razabracca. Kamu — padziakavać, kaho — pakarać. Ja nie staŭ heta rabić kułuarna. Razmova pavinna być pryncypovaj, my ludzi vajennyja. Tym bolš niekatoryja fakty hetaj pravierki mianie surjozna naściarožvajuć», — zajaviŭ Łukašenka.
Jon adznačyŭ, što tolki sioleta na ŭzroŭni prezidenta da pytańniaŭ pamiežnaj biaśpieki źviartajucca treci raz. «Heta aznačaje, što jość nie prosta naściarožanaść, a, skažu ščyra, hłybokaje niezadavalnieńnie stanam asobnych kirunkaŭ u dziejnaści Dziaržpamiežkamiteta, — zajaviŭ Łukašenka. — Pakolki my tranzitnaja kraina (miaža nabyvaje vielmi surjoznaje značeńnie), my admachnucca ad hetych pytańniaŭ nie možam».
«Pytańnie nie ŭ tym, kab padziakavać abo pakarać. Jano składajecca ŭ tym, kab paśla hetaha było lepš na miažy. A toje, što budzie lepš, ja ŭ hetym nie sumniavajusia. Skažu pa-mužčynsku: z vami ci biez vas (pytańnie tolki ŭ hetym), ale budzie lepš. My nie možam dazvolić sabie ŭtrymlivać takuju kolkaść pamiežnikaŭ i mieć prablemy», — dadaŭ Łukašenka, źviartajučysia da ŭdzielnikaŭ pasiadžeńnia.
«Pavodle vynikaŭ narady dadzienyja kankretnyja daručeńni, jakija tyčacca ŭdaskanaleńnia pracy i padrychtoŭki pamiežnikaŭ, pavyšeńnia efiektyŭnaści apieratyŭnaj pracy siarod nasielnictva ŭ pamiežnaj zonie. Alaksandr Łukašenka źviarnuŭ uvahu na nieabchodnaść praviadzieńnia acenki pryjarytetaŭ u dziejnaści viedamstva z ulikam sučasnaha stanovišča. U liku asnoŭnych kirunkaŭ nazyvalisia ekanamičnaja biaśpieka i supraćdziejańnie terarystyčnym pahrozam. Pry hetym nieabchodny pastajanny i bieśpierapynny analiz situacyi z boku nie tolki Dziaržpamiežkamiteta, ale i siłavoha błoka krainy ŭ cełym», — paviedamlaje pres-słužba.
Što da paŭsiadzionnaj pracy orhanaŭ pamiežsłužby, to pravierki ich dziejnaści stanuć rehularnymi.
Jak paviedamlaje dziaržaŭnaje infarmacyjnaje ahienctva BiełTA, pravierka orhanaŭ pamiežsłužby pa pytańniach achovy dziaržaŭnaj miažy pravodziłasia z krasavika pa červień. U tym liku praviarałasia praca pamiežnikaŭ u punktach propusku, achova niepasredna zialonaj miažy i praca ŭ pamiežnaj zonie.
«Prezident kankretyzavaŭ zadačy. Nieabchodna praanalizavać ryzyki, vykliki i pahrozy, jakija źjaŭlajucca, nie tolki pamiežnaj, ale i nacyjanalnaj biaśpiecy i adaptavać sistemu achovy miažy da ich, kab my mahli ich svoječasova paryravać», — zajaviŭ žurnalistam paśla narady kiraŭnik Dziaržpamiežkamiteta Leanid Malcaŭ.
Jon skazaŭ, što na dapamohu pamiežnikam u achovie miažy hatovyja pryjści ajčynnyja techničnyja raspracoŭki. Adna ź ich — sihnalizacyjny kompleks chutkaha razhortvańnia «Pavuk». Jon nie tolki reahuje na čałavieka abo źviera, ale taksama na roznyja latalnyja aparaty na vyšyni da adnaho kiłamietra. «Na nizkich vyšyniach zaŭsiody była prablema. My zdoleli atrymać srodak, jaki budzie kantralavać pavietranyja celi z 0 da 1 tys. m, i inšyja sihnalizacyjnyja kompleksy», — paviedamiŭ Malcaŭ.
Kamientary