Kanał ANT prajšoŭsia pa pravasłaŭnych «patryjatyčnych» letnikach, jakija arhanizoŭvajuć ruskija nacysty dla biełaruskich padletkaŭ
Pieršaha žniŭnia dziaržaŭny kanał ANT vypuściŭ siužet «Tatuiroŭki za miažoj marali i zakona», jaki pačynajecca z historyi žychara Zasłaŭja, jaki pa maładości nabiŭ sabie nacysckija nakołki.
Ale kudy bolš uvahi aŭtary nadajuć psieŭdapravasłaŭnamu nieanacyzmu — temie, da jakoj «Naša Niva» ŭžo daŭno pryciahvaje ŭvahu. U siužecie vykarystoŭvajucca skrynšoty z sajta «Našaj Nivy» i pryvodziacca fakty, vykrytyja našymi žurnalistami.
U siužecie nośbity nacysckich idej atajesamlajucca z aktyvistami «ruskaha śvietu».
«Samy jaskravy ŭzor — RNIE — «Ruskaje nacyjanalnaje adzinstva». Jaho aktyvisty zaklikajuć biełarusaŭ admovicca ad svajoj dziaržaŭnaści i vykarystoŭvajuć tyja ž žesty, što i niamieckija fašysty», — pieradaje ANT. Dalej iduć kadry, dzie niekalki čałaviek «zihujuć» pad voklič «Słava Rasii».
«Viadomyja fakty, — praciahvaje žurnalist, — kali aktyvisty RNIE praz sacyjalnyja sietki sprabavali vierbavać biełarusaŭ na vajnu ŭ Danbasie».
Dalej robiacca vysnovy, što dla ŭzmacnieńnia ŭpłyvu na rozum nieanacyzm źmiešvajuć z pravasłaŭnaj simvolikaj.
«Relihijnuju kartu sprabujuć vykarystać i inšyja, padobnyja da RNIE ruchi: arhanizoŭvajuć pajezdki ŭ padletkavyja vajenna-patryjatyčnyja letniki na terytoryi Rasii, a tam — vučać vajavać», — ANT pakazvaje skrynšot z sajta «Našaj Nivy», raskazvajučy pra Alaksieja Milčakova i jaho «podźvihi» na hlebie zabojstva sabak i ludziej. Milčakova nazyvajuć «ruskim nieanacystam».
«Patryjatyčnyja łahiery z pravasłaŭnym uchiłam i pad ściaham rasijskaj impieryi fiksujuć u roznych kutkach Biełarusi, — praciahvaje ANT. — Čym zakančvajucca takija hulni ŭ «Zarnicu», dobra pamiatajuć žychary adnoj ź viosak na Homielščynie: 17 hadoŭ tamu jaje zachapili padletki adnoj rasijskaj vajenna-patryjatyčnaj arhanizacyi. Ludziej pabili i ŭziali ŭ zakładniki. I chacia takija vučeńni skončylisia dla ich arhanizatara, hramadzianina Rasijskaj Fiederacyi, turmoj, padobnyja piedahohi nie pieravialisia».
Pry hetych słovach u efiry milhajuć skrynšoty staronki psieŭdakazaka Siarhieja Zubackaha — fihuranta adnaho z rasśledavańniaŭ «Našaj Nivy», siabra čarnasocienskich arhanizacyj «Niomanskaje kazactva» i «Kazacki spas».
Taksama ŭ siužecie dajecca słova supracoŭnikam milicyi i kolišniamu siabru RNIE.
Całkam siužet možna pahladzieć na sajcie ANT.
-
Italjaniec pierajechaŭ u biełaruskuju viosku i pačaŭ piačy sapraŭdnuju picu na drovach
-
«90 čałaviek vyhnali pad piakučaje sonca i trymali tam try hadziny. Ja paŭtarała tolki adnu malitvu: niachaj im usio vierniecca»
-
Ci chopić sioleta €2000, kab adpačyć na mory? Što adbyvajecca z cenami na letni adpačynak
Ciapier čytajuć
Jak skłaŭsia los vypusknikoŭ, jakimi žurfak hanaryŭsia 10 hadoŭ tamu? Historyja adnaho ŭračystaha kałaža30
Kamientary