Biełaruska prasłaviłasia na Suśvietnych dniach moładzi: uźniała transparant «Papa, patelefanuj mnie» FOTAFAKT
Biełaruska z Hrodna Jana Šostak, jakaja ŭžo niekalki hadoŭ žyvie i vučycca ŭ Polščy (apošnim časam — u Krakaŭskaj akademii mastactvaŭ), čakaje zvanka ad Papy Franciška. Dziaŭčyna ŭdzielničała u Suśvietnych dniach moładzi ŭ Krakavie ŭ jakaści vałanciora.
31 lipienia na sustrečy Pantyfika z vałanciorami ŭ Taŭron Arenie Jana vystaviła vialiki transparant z nadpisam «Papa, call me» i numaram svajho telefona. Hetuju abjavu pakazali pa telekanałach roznych krain.
«Pakul Papa nie telefanavaŭ, ale ja atrymała šmat sms i zvankoŭ ad ludziej z roznych krain — Indyi, Polščy, Šviejcaryi, Anhlii, Hiermanii. Niekatoryja žartavali, a inšyja pradstaŭlalisia pierakładčykam Papy Franciška. Adzin z tych, chto napisaŭ sms, prasiŭ pieradać Pantyfiku, što jaho lubiać. Ja nie hublaju nadziei, što Papa patelefanuje mnie», — adznačyła maładaja artystka u kamientary krakow.wyborcza.pl.
Jana dadała, što prośba da Papy była artystyčnaj akcyjaj. «Niekatoryja artysty ahalajucca, a ja pakazała publična moj numar telefona», — zaŭvažyła Jana Šostak.
Taksama padčas SDM biełaruska razam z polskaj studentkaj Krakaŭskaj akademii mastactvaŭ Maryjaj Albrychtovič ažyćciavili prajekt «Who Is Your Pope?». Jany stvaryli ściah z vobrazam Papy Franciška ŭ stylistycy SDM i biez kansultacyj z arhanizatarami mižnarodnaha mierapryjemstva raźmiaścili jaho na krakaŭskaj płoščy pobač sa ściahami, jakija pradstaŭlajuć Jana Paŭła Druhoha i śviatuju Faŭstynu (niabiesnych zastupnikaŭ SDM).
Suśvietnyja dni moładzi prajšli ŭ Krakavie 26-31 lipienia. U zaklučnaj imšy z udziełam Papy Franciška ŭziali ŭdzieł ad 2,5 da 3 miljonaŭ čałaviek z bolš čym 180 krain.
Kamientary