Biełaruskaja antyjadziernaja kampanija patrabuje spynić budaŭnictva BiełAES
Aktyvisty Biełaruskaj antyjadziernaj kampanii (BAJAK) ličać niedapuščalnym vykarystańnie reaktara paśla incydentu, jaki zdaryŭsia na AES, što budujecca ŭ Astraŭcy, i patrabujuć nieadkładna spynić budaŭnictva stancyi.
Takoje patrabavańnie ŭtrymlivajecca ŭ adkrytym liście, raspaŭsiudžanym BAJAK 3 žniŭnia. Zvarot adrasavany kiraŭnictvu Biełarusi, Litvy i ES, vykanaŭcam i kantralujučym budaŭnictva BiełAES orhanam, a taksama takim mižnarodnym arhanizacyjam, jak Kamitet pa ažyćciaŭleńni kanviencyi Espaa i MAHATE.
Aŭtary lista, u liku jakich ekśpierty atamnaj haliny prafiesar, doktar techničnych navuk Hieorhij Lepin, kandydaty techničnych navuk Juryj Varoniežcaŭ i Jahor Fiadziušyn, dajuć svaju acenku aficyjnym zajavam i kamientaram z nahody incydentu z korpusam reaktara pieršaha enierhabłoka, jaki zdaryŭsia 10 lipienia. Zvarot taksama padpisali Biełaruskaja partyja «Zialonyja» i HA «Ekadom».
Jak adznačajecca ŭ liście, najaŭnaja na siońnia aficyjnaja infarmacyja pra incydent daje padstavy mierkavać, što «padčas pieramiaščeńnia pry dapamozie strop i krana korpus reaktara nachiliŭsia i atrymaŭ udar u nižniuju častku korpusa ab plity mantažnaj placoŭki».
Aktyvisty kampanii sumniajucca ŭ zajavach rasijskich śpiecyjalistaŭ, pieradadzienych ŚMI, ab tym, što korpus nibyta nie atrymaŭ nijakich paškodžańniaŭ, pakolki, pavodle aficyjnaj infarmacyi, na im bačnyja ślady ad strop, a jaho nižniaja častka «sudakranułasia» ź bietonnaj plitoj pry «saślizhvańni».
Uličvajučy hetyja fakty, a taksama «asablivyja patrabavańni da adsutnaści jakich-niebudź, navat najdrabniejšych defiektaŭ hetaha abstalavańnia», aŭtary zvarotu pryjšli da vysnovy pra kateharyčnuju nieprymalnaść dalejšaha vykarystańnia hetaha korpusa.
BAJAK vykazała niedavier hienpadradčyku i zakazčyku budaŭnictva, a taksama kantralujučym orhanam budaŭnictva BiełAES — rasijskaj arhanizacyi «Atambudekspart», Ministerstvu enierhietyki Biełarusi i RUP «Biełaruskaja atamnaja elektrastancyja», bo infarmacyja pra incydent zamoŭčvałasia na praciahu bolš jak dvuch tydniaŭ, a zatym nasiła supiarečlivy charaktar.
Aŭtary adkrytaha lista adznačajuć, što aficyjnyja paviedamleńni pra incydent sparadžajuć jašče bolš pytańniaŭ: navošta reaktar pieramiaščali ŭ načny čas sutak; jakoje abstalavańnie vykarystoŭvałasia pry pieramiaščeńni; ci mahčymaja poŭnaja i vyčarpalnaja defiektaskapija korpusa reaktara na placoŭcy budaŭnictva AES? Ekśpierty BAJAK miarkujuć, što parušeńni technałohii byli surjoznymi, inakš nielha było b kazać pra jakija-niebudź pierakosy i saślizhvańnie pry «strapoŭcy».
Pradstaŭniki kampanii ličać, što incydent źjaviŭsia zakanamiernym vynikam papiarednich surjoznych parušeńniaŭ. Tak, budaŭnictva BiełAES pačałosia z parušeńniem techničnych normaŭ, nacyjanalnaha i mižnarodnaha zakanadaŭstva, uklučajučy kanviencyi JEEK AAN, Orchuskuju i Espaa. A zbudavańnie reaktarnych budynkaŭ było pačata biez architekturnaha prajekta AES, da jaho dziaržekśpiertyzy i vydačy licenzij. Acenka ŭździejańnia na navakolnaje asiarodździe (AUNA), jak i pracedura jaje abmierkavańnia, byli sfalsifikavanyja, havorycca ŭ liście. «Usio heta razam z ekśpierymientalnym charaktaram prajekta, nizkaj techničnaj kulturaj padradčyka zakłała «padmurak» dla dalejšych parušeńniaŭ i incydentaŭ, jakija stvarajuć vializnyja i nieacennyja ryzyki», — havorycca ŭ tekście zvarotu.
BAJAK patrabuje nieadkładnaha i biezumoŭnaha spynieńnia budaŭnictva AES, a taksama stvareńnia niezaležnaj mižnarodnaj kamisii dla kampietentnaha i abjektyŭnaha rasśledavańnia incydentu z uklučeńniem u jaje skład svaich pradstaŭnikoŭ-ekśpiertaŭ.
Aŭtary zvarotu ličać nieabchodnym daručyć rasśledavańnie hetaha incydentu i inšych parušeńniaŭ na budaŭnictvie BiełAES Hienprakuratury Biełarusi i patrabujuć apublikavać videazapis incydentu razam z ekśpiertnymi zaklučeńniami acenki jaho nastupstvaŭ.
Kamientary