Pieršyja čaści VPS ZŠA z najnoŭšymi źniščalnikami F-35 hatovyja da boju
Na śpiecyjalnaj pres-kanfierencyi Vajenna-pavietranyja siły ZŠA abviaścili, što ŭzroŭniu «pačatkovaj bojehatoŭnaści» dasiahnuła pieršaja eskadrylla, uzbrojenaja źniščalnikami 5 pakaleńnia F-35A, paviedamiŭ partał defensenews.com.
Kryteryi «pačatkovaj bojehatoŭnaści» - najaŭnaść jak minimum 12 samalotaŭ u patrebnaj madyfikacyi, zdolnaść vykonvać bazavyja zadačy pa padtrymcy naziemnych vojsk, vieści bai ŭ pavietry i zmahacca z varožaj pavietranaj abaronaj.
Taksama lotny i techničny piersanał pavinien być padrychtavanym, a samaloty i piłoty pavinny być hatovymi da vykarystańnia jak minimum rakiet «pavietra-pavietra» siaredniaj dalnaści i karektavanych avijabombaŭ z unutranych kantejnieraŭ.
![](http://nashaniva.com/img/w732d4webp1/photos/z_2016_08/plane0308-ark1l.jpg.webp)
Z F-35 ZŠA mohuć zachavać panavańnie ŭ pavietry na nastupnyja 30-40 hod, adznačali raniej pradstaŭniki Pientahona.
Ciapier Rasija i Kitaj raspracoŭvajuć svaje mašyny piataha pakaleńnia, adnak da pryniaćcia ich na ŭzbrajeńnie mohuć prajści jašče mnohija hady.
F-35 Lightning II — šmatmetavy źniščalnik piataha pakaleńnia, jaki maje radykalna źnižanuju zaŭvažnaść dla radaraŭ. Samalot maje try asnoŭnyja madyfikacyi: F-35A — bazavaja madel dla VPS, F-35B — madel viertykalnaj pasadki i skaročanaha ŭźlotu, F-35C — madel dla marskoj avijacyi, aptymizavanaja dla ŭźlotu i pasadki na avijanoscach.
Samalot maje vielmi šyrokuju namienkłaturu ŭzbrajeńnia i maje abjomnyja ŭnutranyja kropki padvieski rakiet i bombaŭ dla zachavańnia minimalnaj zaŭvažnaści.
U boj na Bližni Uschod samalot, chutčej za ŭsio, patrapić nie raniej za 2017 hod. Baziravacca mašyny buduć taksama ŭ Jeŭropie i na bazach u Azijacka-Cichaakijanskim rehijonie.
Ciapier ZŠA majuć užo kala 200 samalotaŭ F-35 roznych madyfikacyj. Taksama chaŭruśniki ZŠA majuć svaje madyfikacyi samalota.
Košt kožnaj mašyny na pačatkovym etapie — kala $100 młn z-za adnosna małoj sieryi, ale dalej košt budzie źnižacca z-za rostu abjomu zamoŭ.
Kamientary