Dobra, što amierykanskaja himnastka naohuł skončyła vystup na Alimpijadzie, piša by.tribuna.com.
Reuters
58-ja z 59
Himnastka Kajli Dyksan nie prabiłasia ŭ finał šmatborja i indyvidualnyja finały. Jana zaniała 58-je miesca z 59 spartsmienak, jakija zmahli zaviaršyć kvalifikacyju. Abyšła tolki ŭdzielnicu Farach Bufaden z Ałžyra.
I čaho zavodzicca?
Mahčyma, vy nie viedali, ale Dyksan — naša himnastka. Paŭtara hoda tamu Biełaruskaja asacyjacyja himnastyki vyrašyła, što lepš choć niešta, čym ničoha. Biełaruskaje hramadzianstva atrymali amierykanskija spartsmienki Kajli Dyksan i Śju Kvan. U vyniku Kvan navat nie pajechała na Alimpijadu. U Dyksan z dasiahnieńniaŭ tolki toj fakt, što jana skončyła vystup na Hulniach.
Boža, jak ža tak vyjšła?
Jašče za hod da hetaj biazhłuzdaj naturalizacyi haspadynia sietki kram djuci-fry Alena Skrypiel uznačaliła Biełaruskuju asacyjacyju himnastyki. Jana tut ža zahavaryła pra hłabalnaje raźvićcio biełaruskaj himnastyki i pracu nad viartańniem trenieraŭ z byłoha SSSR. Pryvieźli pakul spartsmienak. Ich prapanavała Neli Kim, jakaja raniej vystupała za BSSR i treniravała nacyjanalnuju kamandu.
Jakija adnosiny jany mieli da Biełarusi?
Nijakich! Heta i aburyła. Dziaŭčynki vystupili na čempijanacie śvietu-2015, tak ni razu navat nie pabyvaŭšy ŭ našaj krainie. Ni razu! Paśla turniru? Taksama nie. Kvan i Dyksan treniravalisia ŭ ZŠA. Staršynia asacyjacyi i trenier uchvalili heta, zaŭvažyŭšy, što spartsmienkam niama sensu kidać siamju, umovy i lacieć u Biełaruś. Dyksan nie pabyvała ŭ nas u haściach navat da Alimpijady. Staršy trenier zbornaj Antanina Košal nie pabačyła ŭ hetym prablemy.
Choć niešta źviazvaje z našaj krainaj?
Chiba što ŭ prafajle Dyksan značycca praca z vychadcami z byłoha SSSR. U rozny čas joju zajmalisia Uładzimir Novikaŭ (alimpijski čempijon Sieuła ŭ kamandnych spabornictvach) i Artur Akapian (dvuchrazovy čempijon Sajuza ŭ apornym skačku). Kvan taksama treniravałasia pad kiraŭnictvam Akapiana.
Moža, jany čempijonki ŭsiudy i va ŭsim?
Taksama mima. U kvalifikacyi čempijanatu śvietu Kvan i Dyksan zaniali 73-je i 75-je miesca ŭ mnahaborji. Pra Alimpijadu navat pisać soramna. Byŭ pravał užo ŭ kvalifikacyi, ale spartsmienku abaraniali.
Niaŭžo heta taki vialiki pravał?
Tak. U alimpijskim mnahaborji Dyksan nabrała vielmi i vielmi słabuju sumu — 47,798 bała (aporny — 13,866, brusy — 12,833, bierviano — 10,333, volnyja — 10,766). Heta amal na cełych 4 bały mienš, čym Kajli atrymała na kvalifikacyjnym da Alimpijady ČS-2015, dzie, nahadajem, zaniała 75-je miesca. Padobna na toje, što heta pravał.
Reuters
«Presboł» zadaŭ Kajli niekalki pytańniaŭ:
— Ci nie biantežyć, što ty da hetaha času ni razu nie źjaviłasia ŭ Biełarusi?
— Ja nie mocna z-za hetaha pieražyvaju. Tak atrymałasia. Napeŭna, heta krychu dziŭna, ale ŭ mianie byli važkija pryčyny. Śpiarša ja rychtavałasia da čempijanatu Jeŭropy, u mianie była vučoba, kaledž… Kidać usio heta i lacieć niekudy nie maje vialikaha sensu. Dy hetaha i nie patrabavali. U svoj čas, kali mnie prapanavali vystupać za Biełaruś, ja nie doŭha dumała. Rašyłasia praktyčna adrazu, tamu što vielmi chacieła vystupać. Ale pierajazdžać… Ja, darečy, i ciapier vielmi dobra kamunikuju ź dziaŭčatami sa zbornaj ZŠA, my pravodzim šmat času razam.
— A što ty viedaješ pra Biełaruś, budučy biełaruskaj užo bolš za hod?
— Nie vielmi šmat. Viedaju, što heta pryhožaja kraina, u jakoj ja kali-niebudź chacieła b pabyvać. Ale pakul ja źjaŭlajusia spartoŭkaj, jakaja prosta imkniecca dapamahčy kamandzie, vialikuju častku času pravodziačy ŭ ZŠA. Choć u alimpijskaj vioscy ja žyvu razam ź biełaruskimi spartoŭcami. My, praŭda, nie vielmi blizka kamunikujem, hulaju ja, čaściej za ŭsio, adna. Da taho ž pračynajusia rana, šmat trenirujusia… Uvohule, nie da znajomstvaŭ i zabaŭ. Ale ja viedaju, što dziaŭčyna z ZŠA hulaje ŭ baskietbolnaj zbornaj. Takaja nievysokaja, viedajecie ž? Abaronca. Tak cikava: dźvie amierykanki vystupajuć za Biełaruś! Pamiataju, my sustrelisia ź joj u kalidory i vielmi ŭzradavalisia. Jana, akazvajecca, bačyła mianie na niejkich spabornictvach. Zakryčała: «Vau, nie moža być! Heta praŭda ty?!» Zdorava ź joj tady paśmiajalisia. Ja, darečy, lublu baskietboł i nie liču, što źmiena hramadzianstva i pierachod spartsmienaŭ u inšyja kamandy źjaŭlajecca čymści, što moža zrabić ich, naprykład, vorahami dla kahości.
