Dakumientalnuju stužku «Hości», źniatuju admysłova dla «Biełsatu» režysioram Andrejem Kuciłam, pakažuć na adkryćci kinafiestyvalu «Provinziale» ŭ Ebiersvalde (Eberswalde).
«Paśla prahladu 913 filmaŭ z 70 krain prahramnaja kamisija 13-ha Kinafiestyvalu ŭ Ebiersvalde kančatkova akreśliła mižnarodnuju konkursnuju prahramu. My rady paviedamić Vam, što Vaš film «Hości» byŭ abrany dla ŭdziełu ŭ konkursnaj prahramie dakumientalnych filmaŭ 13-ha Kinafiestyvalu ŭ Ebiersvalde. Vinšujem! Film «Hości» adkryje fiestyval», — napisali «Biełsatu» arhanizatary.
Fiestyval raspačniecca 1-ha kastryčnika. Pieramožca ŭ katehoryi «najlepšy dakumientalny film» atrymaje ŭznaharodu pamieram €4 tys.
Stužka «Hości» budujecca na ŭvažlivym i praciahłym nazirańni za žyćciom unikalnaha pasielišča ŭ Biełarusi — pieršaha i, badaj, adzinaha niefarmalnaha prytułku dla biednych i źniamohłych ludziej.
Hałoŭny hieroj filmu Alaksiej Ščadroŭ kaliści pracavaŭ fielčaram u «Chutkaj dapamozie». Pa vyklikach jamu časta davodziłasia zabirać na vulicach biazdomnych ludziej, ale praź niekalki kiłamietraŭ bryhada znoŭ vykidała ich na vulicu. Trapiŭšy za kraty, Alaksiej sam akazaŭsia nikomu nie patrebny. Turma pieraviarnuła śvietapohlad byłoha fielčara. Jaho ideałam stała maci Tereza — uvasableńnie chryścijanskaha ŭzoru tryvałaści, miłasernaści dy lubovi da adrynutych. Pa vyzvaleńni Alaksiej niekalki hadoŭ badziaŭsia i žyŭ pry kaściołach.
Paśla jon pasialiŭsia ŭ vioscy Alaksandraŭka Ščučynskaha rajonu, dzie zarhanizavaŭ niezvyčajny prytułak, staŭ prymać i dahladać biednych, chvorych, biazdomnych ludziej, dapamahać im adnavić dakumienty i viarnucca da narmalnaha ładu žyćcia. Nieŭzabavie nieabyjakavyja biełarusy pačali dapamahać prytułku ježaj, adzieńniem dy inšym. Ale miascovym uładam inicyjatyva Alaksieja nie spadabałasia. Z samaha zasnavańnia ciaham niekalkich hadoŭ čynoŭniki prymušali byłoha fielčara začynić prytułak. U pošukach achviaravańniaŭ i duchoŭnaha padtrymańnia Alaksiej vypraviŭsia ŭ Italiju…
Letaś film «Hości» byŭ pryznany najlepšym dakumientalnym filmam u Nacyjanalnym konkursie mižnarodnaha kinafiestyvalu «Listapad» u Miensku.
Kamientary