U Biesłanie ździejśnieny napad na Śviatłanu Marhijevu i Ełu Kiesajevu, dzieci jakich stali achviarami terarystyčnaha aktu ŭ škole. U dzień žałobnych mierapryjemstvaŭ žančyny apranuli majki z abvinavačvańniami ŭ adras prezidenta Rasii Uładzimira Pucina, paviedamili žurnalisty «Novoj haziety» i vydańnia «Takije dieła».
Napadu taksama padvierhlisia supracoŭniki hetych ŚMI Alena Kaściučenka i Dyjana Chačatran.
Pa słovach zasnavalnika «Takich dieł» Dźmitryja Alaškoŭskaha, u žurnalistaŭ adabrali telefony i ablili ich zialonkaj.
Kaleha Kaściučenki Alena Miłašyna paviedamiła, što ŭ napadzie ŭdzielničała hrupa «nieapaznanych ludziej u cyvilnym, jakich u vielizarnaj kolkaści sahnali na terytoryju pieršaj škoły Biesłana».
Pa słovach Miłašynaj, u Kaściučenki adabrali kamieru i telefon, paśla čaho adviali ŭ nieviadomym kirunku.
«Toje ž samaje rabili z Ełaj Kiesajevaj i Śvietaj Marhijevaj. U ich adabrali kamiery, kali jany zdymali, jak ich atačajuć ludzi ŭ cyvilnym. Z Kaściučenkaj suviazi niama», — napisała Miłašyna ŭ svaim Fejsbuku.
«Novaja hazieta» zajaviła, što maje namier źviarnucca ŭ Śledčy kamitet pa fakcie biaździejnaści palicejskich pry napadzie na žurnalistaŭ.
Eła Kiesajeva, Śviatłana Marhijeva i jašče try žančyny 1 vieraśnia ŭ čas žałobnych mierapryjemstvaŭ u Biesłanie apranuli majki z nadpisami, jaki abvinavačvajuć Pucina ŭ tym, što adbyłosia ŭ Biesłanie.
U čatyroch ź piaci udzielnic akcyi ŭ zachoplenaj terarystami škole zahinuli dzieci.
Žančyny patrabavali rasśledavańnia trahiedyi i abvinavačvali pravaachoŭnyja orhany ŭ abstrele škoły, u jakoj znachodzilisia zakładniki.
Ich zatrymali pa abvinavačvańni ŭ parušeńni paradku praviadzieńnia mitynhaŭ. Try ŭdzielnicy akcyi byli prysudžanyja da 20 hadzin hramadskich prac, dźvie — da štrafaŭ u pamiery 20 tysiač rubloŭ.
1 vieraśnia 2004 hoda ŭ škole numar 1 Biesłana adbyŭsia terakt: na praciahu dvuch z pałovaj dzion u budynku škoły napadniki ŭtrymlivali 1128 čałaviek. U asnoŭnym zakładnikami byli dzieci, ich baćki i rabotniki škoły. U vyniku teraktu i pry šturmie budynka zahinuli 314 zakładnikaŭ, a niekalki socień čałaviek atrymali ranieńni.
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy6
Kamientary