Niezaležny naziralnik pa Kalinoŭskaj vybarčaj akruzie №108 Viktar Kułak śćviardžaje, što na ŭčastak №637 prosta nie mahła dobraachvotna pryjści hałasavać takaja kolkaść studentaŭ.
«Ja pryjechaŭ na ŭčastak u Centr hreka-rymskaj baraćby 6 vieraśnia a pałovie na dziasiatuju ranicy, — raspaviadaje Viktar. — Tam čarha studentaŭ. Ja spačatku dumaŭ, što jany na niejkuju imprezu pryjšli, a jany ŭsie — hałasavać. Ja staŭ vieści padlik i naličyŭ dzieści 400-500 čałaviek, jakija prahałasavali. A ŭ dadzienych kamisii — 928».
Naziralnik padaŭ dźvie skarhi na imia staršyni ŭčastkovaj kamisii. Pieršaja tyčyłasia pieravyšeńnia ličbaŭ u padlikach, druhaja — vialikaj kolkaści studentaŭ, jakaja vyklikaje pytańni. Čaho raptam usie kinulisia daterminova hałasavać adrazu ŭ pieršy dzień?
Takija samyja skarhi ŭ akružnuju kamisiju nakiravaŭ kandydat u deputaty pa hetaj vybarčaj akruzie Jury Hubarevič.
«Pryjechali try pradstaŭniki z akružnoj kamisii, — praciahvaje naziralnik Viktar Kułak. — Na maje zaŭvahi, što niemahčyma, kab takaja kolkaść studentaŭ pryjšła prosta tak, biez pahrozaŭ atrymać «niezalik» ci być adličanymi, pradstaŭniki kamisii pryvodzili kontrarhumienty. Maŭlaŭ, niemahčyma takoj kolkaści studentaŭ razam pastavić «niezalik» ci vyklučyć. Ale ž heta tolki śmiełyja, pryncypovyja studenty mahli nie pasłuchacca i nie pajści».
Naziralnik taksama paviedamiŭ, što na jaho vačach studentka, jakuju pieranakiravali hałasavać pa miescy rehistracyi, zapytałasia: «A čamu tut nielha? Nam vykładčyk skazaŭ, što možna». Siabry kamisii na heta stali joj kazać, što jana niešta nie tak zrazumieła.
Pa stanie na viečar 8 vieraśnia aficyjnaja daterminovaja jaŭka na hetym učastku dasiahnuła 67,9%.
Ciapier čytajuć
Chto taki Maćviej Bialaj, jakoha nibyta departavali ŭ Biełaruś? Raskazvajem historyju dziŭnaha aktyvista z padazronym minułym2
Kamientary