Abranaja deputatam Pałaty pradstaŭnikoŭ pa 70-j Staŭbcoŭskaj akruzie Alena Anisim, namieśnik staršyni hramadskaha abjadnańnia «Tavarystva biełaruskaj movy imia F.Skaryny» (TBM), nie ŭsprymaje parłamient jak «varožy łahier».
Pra heta jana zajaviła 13 vieraśnia padčas anłajn-kanfierencyi na sajcie Naviny.by.
«Dla mianie heta miesca dla pracy, i vynik jaje budzie zaležać ad tych namahańniaŭ, jakija ja prykładu, — skazała Anisim. — U parłamiencie baču svaju rolu ŭ tym, kab być trybunam ad imia ludziej, jakija majuć alternatyŭny pohlad na raźvićcio našaj krainy i zacikaŭlenyja ŭ jaje paśpiachovaj budučyni».
Novaabrany deputat paviedamiła, što ŭ pieršuju čarhu maje namier prasoŭvać u parłamiencie zakonaprajekt ab padtrymcy biełaruskaj movy. «Pieršačarhovaja maja zadača — spryjać, kab biełaruskaja mova stała realna dziaržaŭnaj, štodnia hučała ŭ parłamiencie. Vyniesu na razhlad deputataŭ prajekt zakona ab dziaržaŭnaj padtrymcy biełaruskaj movy, jaki padavaŭsia ŭ parłamient papiaredniaha sklikańnia, ale nie byŭ padtrymany», — skazała jana.
Akramia taho, Anisim budzie vystupać za stvareńnie nacyjanalnaha ŭniviersiteta ź biełaruskaj movaj navučańnia i novaha, całkam biełaruskamoŭnaha, dziaržaŭnaha telekanała. Jašče adna jaje inicyjatyva — kab usie zakonaprajekty rychtavalisia na dźviuch dziaržaŭnych movach.
Na pytańnie, ci varta padniać u parłamiencie pytańnie ab statusie bieł-čyrvona-biełaha ściaha, kab za jaho vykarystańnie hramadzian nie pieraśledavali, deputat adznačyła: «Dumaju, što hetaje pytańnie aktualnaje, i ŭsio hatova dla jaho stanoŭčaha rašeńnia».
Što tyčycca prablem ekanomiki, to, pavodle słoŭ Anisim, jana maje namier realizoŭvać punkty svajoj pieradvybarnaj prahramy: pierahledzieć sistemu zarpłat, kab nie było istotnaj raźbiežki pamiž zarobkam deputata-biudžetnika i rabotnika kultury, nastaŭnika i miedsiastry; ažyćciavić paŭnavartasnuju piensijnuju reformu; zrabić sistemu padatkaabkładańnia maksimalna prazrystaj i pradkazalnaj.
Deputat paabiacała apublikavać u internecie svaju deputackuju zarpłatu, jak tolki jaje atrymaje.
Na pytańnie, ci pryznačyli jaje ŭłady ŭ Pałatu pradstaŭnikoŭ abo dali mahčymaść realna vyjhrać, Anisim adkazała: «Kali b ja nie sustrakałasia z vybarščykami i nie adčuvała ich padtrymku, a prosta siadzieła ŭ kabiniecie abo internecie, to možna było b ličyć, napeŭna, što mianie chtości pryznačyŭ. Ale škvał tych vinšavańniaŭ, jakija ja atrymała, tyja telefonnyja zvanki z akruhi ad vybarščykaŭ śviedčać pra realnuju padtrymku majoj kandydatury. Na asobnych učastkach za mianie prahałasavała 75% vybarščykaŭ».
Pavodle danych, apublikavanych CVK, Anisim nabrała 40,5% hałasoŭ vybarščykaŭ.
