Suśvietnaje antydopinhavaje ahienctva WADA zajaviła, što rasijskaja hrupoŭka, jakaja zajmajecca kibieršpijanažam, niezakonna atrymała dostup u sistemu antydopinhavaha administravańnia i mieniedžmientu (ADAMS).
Pavodle zajavy arhanizacyi, chakierskaja hrupoŭka Fancy Bear atrymała dostup da infarmacyi ab atletach, uklučajučy kanfidencyjnyja miedycynskija dadzienyja.
Havorka idzie ŭ tym liku ab «vyklučeńniach dla terapieŭtyčnaha vykarystańnia», jakija adnosiacca da Alimpijady ŭ Rya, to bok zabaronienych preparatach, jakija niekatorym spartsmienam dazvolena prymać pry adpaviednych miedycynskich pakazańniach.
Chakiery vykłali hetyja dadzienyja i paabiacali apublikavać jašče bolš materyjałaŭ.
«WADA asudžaje kibierataki, zaklikanyja nanieści škodu WADA i hłabalnaj antydopinhavaj sistemie», — zajaviŭ hienieralny dyrektar Suśvietnaha antydopinhavaha ahienctva Aliŭje Nihli.
«WADA było prainfarmavanaje supracoŭnikami pravaachoŭnych orhanaŭ, što hetyja napady byli ździejśnienyja z Rasii. Hetyja złačynnyja dziejańni staviać pad pahrozu namahańni mižnarodnaj supolnaści pa baraćbie z dopinham, kab adnavić davier da Rasii paśla niezaležnaha dakładu Makłarena», — dadaŭ jon.
Antydopinhavaje ahienctva miarkuje, što dostup byŭ atrymany z dapamohaj fišynh-napadaŭ na akaŭnty elektronnaj pošty, z dapamohaj jakich chakiery daviedalisia paroli dla ŭvachodu ŭ sistemu ADAMS.
Pry hetym u arhanizacyi ličać, što havorka idzie tolki ab infarmacyi z padziełu, što datyčycca Alimpijady ŭ Rya-de-Žaniejra.
Pavodle dadzienych rasijskich ŚMI, chakiery vykłali asabistyja miedycynskija dadzienyja amierykanskich tenisistak Siereny i Vinus Uiljams, a taksama himnastki Simony Bajłz.
Pryvatnyja ahienctvy biaśpieki, jakija rasśledavali ŭzłom sietak Nacyjanalnaha kamiteta Demakratyčnaj partyi, u lipieni nazvali Fancy Bear adnoj ź dźviuch chakierskich hrup, adkaznych za heta niesankcyjanavanaje praniknieńnie, i źviazali jaje z Hałoŭnym raźviedvalnym upraŭleńniem (HRU) Hienštaba RF.
