19 vieraśnia raspačaŭsia zbor podpisaŭ za nadańnie bieł-čyrvona-biełamu ściahu statusa niemateryjalnaj historyka-kulturnaj kaštoŭnaści.
«Naša Niva» naviedała pikiet, jaki štodnia budzie znachodzicca ŭ pierachodzie stancyi Kastryčnickaj.
«Ja płanuju źbirać podpisy kožny dzień aproč niadzieli, — raspaviadaje Źmicier Daškievič. — U płanach — sabrać nie mienš za tysiaču podpisaŭ. Paśla raboty ja staju na vychadzie ź mietro «Kupałaŭskaja» ŭ bok kramy «Centralny», i štohadzinu padpisvajecca kala dvaccaci čałaviek. Da kampanii pačynajuć dałučacca i inšyja aktyvisty. Miarkujecca, što praź miesiac my paniasiom podpisy da Ministerstva kultury», — kaža Daškievič.
Achvotnych pastavić podpis davoli šmat, ale niekatoryja bajacca. Zbolšaha heta studentki, ale Źmicier tłumačyć im, što heta zakonna, i dziaŭčaty pakidajuć svoj podpis. Inšaja dziaŭčyna zazirnuła ŭ błank, pabačyła, što treba pakidać proźvišča, i syšła — praŭda, prakryčała «Žyvie Biełaruś!»
Pa hučnaj suviazi paprasili dziažurnaha milicyjaniera padyści da kasy, praź niekatory čas źjavilisia supracoŭniki milicyi ŭ cyvilnym i pačali zdymać zborščykaŭ podpisaŭ na kamieru.
Daškievič prapanoŭvaje ŭsim achvotnym spampavać padpisny błank z asnoŭnymi faktami pra kaštoŭnaść bieł-čyrvona-biełaha ściaha. Fakty, piša jon, pravieranyja na adpaviednaść padziejam historykam Uładzimiram Arłovym.
Padpisny błank vy možacie spampavać pa spasyłcy padpisny-blank-za-biel-czyrvona-biely-sciah
Daškievič prapanoŭvaje vykarystoŭvać chešteh #našściah usim, chto dałučajecca da kampanii.
