Były staršynia Savieta ministraŭ t.zv. «Łuhanskaj narodnaj respubliki» Hienadź Cypkałaŭ, zatrymany «za sprobu dziaržaŭnaha pieravarotu», pakončyŭ z saboj. Pra heta paviedamiŭ pradstaŭnik Hienprakuratury «ŁNR» Siarhiej Rachno, piša Mieduza sa spasyłkaj na Interfaks.
joinfo.ua
«Cypkałaŭ, imavierna, uśviadomiŭšy hłybiniu svaich złačynnych dziejańniaŭ i ŭśviadomiŭšy, što pradstaŭlenaja im apieratyŭnaja infarmacyja pra koła asob, jakija ŭdzielničajuć u zmovie , źjaŭlajecca biezumoŭna niebiaśpiečnaj dla jaho žyćcia, i buduć pryniatyja sproby jaho fizičnaj likvidacyi zmoŭščykami, jakija, znachodziacca na voli, ździejśniŭ samahubstva šlacham paviešańnia», — zajaviŭ Rachno.
Pavodle jaho słoŭ, Cypkałaŭ «utrymlivaŭsia ŭ adnym z administracyjnych budynkaŭ» «ŁNR», bo isnavali aściarohi, što jaho pasprabujuć likvidavać inšyja ŭdzielniki «zmovy».
Na 24 vieraśnia, dadaŭ jon, była zapłanavanaja vočnaja staŭka Cypkałava z adnym z kiraŭnikoŭ Narodnaj milicyi «ŁNR» — Kisialovym, jaki raniej pryznaŭsia ŭ złačynstvie.
Pa viersii Hienprakuratury «ŁNR», udzielniki zmovy, pa padazreńni ŭ dačynieńni da jakoj byŭ zatrymany Cypkałaŭ, płanavali zrynuć, «u tym liku ź fizičnaj likvidacyjaj», kiraŭnictva samaabvieščanaj respubliki.
U pačatku žniŭnia 2016 hoda ŭ Łuhansku byŭ padarvany aŭtamabil kiraŭnika «ŁNR» Ihara Płatnickaha. Pradstaŭniki «ŁNR» abvinavacili ŭ sprobie zamachu na Płatnickaha «ŭkrainskich dyviersantaŭ».
Hienadź Cypkałaŭ zajmaŭ pasadu premjer-ministra «ŁNR» sa žniŭnia 2014 hoda pa śniežań 2015 hoda. Paśla adstaŭki jon ličyŭsia daradcam kiraŭnika «ŁNR».
