24-hadovuju ŭradženku Viciebska vinavaciać u kantrabandzie asabliva niebiaśpiečnaha psichatropnaha rečyva i namiery na jaho zbyt. Pavodle najaŭnaj infarmacyi, zabaronienyja rečyvy znachodzilisia ŭ bahažy Darji B., jaki zatrymaŭsia ŭ šlachu i prylacieŭ z Tureckaj Respubliki Paŭnočny Kipr ŭ Nacyjanalny aeraport Minsk.
Pra heta raspavioŭ staršy pamočnik Minskaha transpartnaha prakurora Maksim Isin.
Pa prybyćci valizki jaje pravieryli ŭ zonie mytnaha kantrolu. Spačatku śpiecyjalna navučany sabaka pačuŭ unutry narkotyki. A padčas ahladu źmieściva bahažu ŭ adnoj sa škarpetak znajšli skrutak, a ŭ im — paŭtary tabletki błakitnaha koleru. U ich składzie, jak pakazała ekśpiertyza, źmiaščajecca asabliva niebiaśpiečnaje psichatropnaje rečyva, jakoje nie vykarystoŭvajecca ŭ miedycynskich metach i viadomaje jak ekstazi.
Padarožnicu zatrymali. Adrazu jana patłumačyła, što tabletki atrymała ad znajomaha ŭ načnym kłubie, a paśla pakłała ich u čamadan, schavaŭšy ŭ škarpetku. Adnak užo na nastupny dzień padazravanaja zajaviła pra svaju niedatyčnaść da złačynstvaŭ, adznačyŭšy, što nie viedała pra znachodžańnie ŭ bahažy zabaronienych rečyvaŭ. Skazała, što ich joj u Turcyi padkinuli niadobrazyčliŭcy. Paśla naohuł admoviłasia davać pakazańni.
Na sudzie biełaruska častkova pryznała svaju vinu. A voś z nahody zbytu ekstazi pazicyja B. zastavałasia niaźmiennaj: maŭlaŭ, nikoha častavać nie źbirałasia. Budučy za miažoj, jana źviazvałasia ź siabroŭkaj z dapamohaj mabilnych prahram. I ŭ chodzie razmovy jany abmiarkoŭvali tabletki. Sa słoŭ abvinavačanaj, razmovy ab pryjomie tabletak treba razhladać u kantekście ŭžyvańnia nie zabaronienych rečyvaŭ, a supakojvajučaha dla baraćby z depresijaj, choć u pierapiscy dziaŭčat efiekt rassłablenaści ad pryjomu preparata apisvaŭsia niajnačaj jak «prychod» i «palatajem». Darja taksama paviedamlała pryjacielcy: «Pałovu tabie zanyčkaryła». Zrešty, siabroŭka taksama nastojvała na tym, što abmiarkoŭvałasia mienavita lekavaje ŭździejańnie tabletak. A jakija jany, nibyta viedać nie viedała.
Taksama byŭ vyjaŭleny fakt hutarki abvinavačanaj ź jašče adnoj jaje znajomaj. Pieršaja pa telefonie padzialiłasia z druhoj tym, što ŭ zatrymanym čamadanie paŭtary tabletki ekstazi i što jana ich prychavała.
U vyniku sud pryznaŭ Darju vinavataj u pieramiaščeńni praz mytnuju miažu Biełarusi, učynienym z utojvańniem ad mytnaha kantrolu i źviazanym ź niedekłaravańniem, a taksama ŭ niezakonnych z metaj zbytu nabyćci i pieravozcy asabliva niebiaśpiečnych psichatropnych rečyvaŭ. Dziaŭčyna prysudžanaja da 12 hadoŭ pazbaŭleńnia voli z adbyvańniem pakarańnia ŭ papraŭčaj kałonii va ŭmovach ahulnaha režymu biez kanfiskacyi majomaści. Prysud nabyŭ zakonnuju moc.
