25 vieraśnia ŭ prastory «Korpus 8» adbyłosia ŭračystaje zakryćcio «Tydnia biełaruskaha myśleńnia» — jaskravaj padziei, jakaja pradstaviła ŭsiu raznastajnaść formaŭ i prajavaŭ biełaruskaha myśleńnia ŭ sučasnym biełaruskim hramadstvie.
— Heta ŭsio nie značyć, što my pamyślili tydzień i razyšlisia pa svaich spravach, — adznačyŭ padčas uračystaj cyrymonii fiłosaf i mietadołah Uładzimir Mackievič. — Ale heta peŭnaje pradjaŭleńnie navonki, raźmiaščeńnie zdabytkaŭ u bolš šyrokaj publičnaj prastory. Hetak ža jak, naprykład, biźniesoŭcy ŭ «Tydzień biźniesa», my prezientvali hramadstvu toje, što stvaryli.
— Prajekt «Hod biełaruskaha myśleńnia» i asabliva — «Tydzień biełaruskaha myślenia» — absalutna ŭnikalny, nidzie nikoli ničoha padobnaha nie było. Ja vinšuju ŭsich z naradžeńniem padziei! — vykazaŭsia fiłosaf, litaratar, kiraŭnik adździaleńnia fiłasofii i litaratury Biełaruskaha Kalehiuma Valancin Akudovič.
«Tydzień» padvioŭ vyniki nie tolki «Hoda biełaruskaha myśleńnia», jaki byŭ abvieščany ŭ traŭni 2015 h. startam supolnaha prajekta «Cytuj svajo», ale i peŭnaj epochi ŭ 30 hod, akreślenaj tekstami dvuch «Antałohij sučasnaha biełaruskaha myśleńnia».
Adna z asnoŭnych dumak, jakaja hučała i padčas vynikovaj dyskusii «Biełaruskaje myśleńnie: quo vadis?», i padčas uračystaj cyrymonii zakryćcia: «Biełaruskaje myśleńnie i myślary jość! Im bolš nie treba zmahacca za isnavańnie i pryznańnie.» A raznastajnaść mierapryjemstvaŭ prahramy «Tydnia» daje padstavu kazać pra złom stereatypnaha ŭjaŭleńnia «myśleńnie — jość vyklučna fiłasofija». Dziakujučy arhanizataram i inicyjatyvam, jakija dałučylisia da praviadzieńnia «Tydnia», udzielniki ŭbačyli, što ŭ intelektualnuju prastoru patraplajuć i muzyki, i architektary, i etnohrafy, i vikipiedysty, i ekołahi. Takim čynam za hety «Tydzień» biełaruskaje myśleńnie istotna pašyryła miažu ŭsprymańnia samoha siabie.
— Hety tydzień daŭ pohlad na zroblenaje, na našu intelektualnuju historyju i sučasnaść, jakaja vymahaje analizu, razumieńnia i daje mahčymaść raźmiaščeńnia siabie ŭ kantekście intelektualnaj prastory i kultury. Ale najbolš kaštoŭnymi stali sustrečy ź ludźmi, dumkami, prablemami, jakija buduć skiroŭvać našuju pracu nadalej, — adznačyła adna z arhanizatarak «Tydnia», kaardynatarka Latučaha ŭniviersiteta Taćciana Vadałažskaja.
Jakim bačycca myśleńnie i myślary dalej?
Nastupny krok — zrabić myśleńnie jašče bolš pryciahalnym i cikavym dla biełarusaŭ. Bo siońnia heta svojeasablivaja scena, prastora, dzie kožny čałaviek ź luboj śfiery, jakomu jość što skazać, maje prava śmieła pradstavić i abmierkavać svaje idei. Ź inšaha boku biełaruskamu myśleńniu varta pašyrać kantekst, pierachodzić ad łakalnych prablem Biełarusi da bolš hłabalnych i ambitnych tem. U stvareńnie novaha źmiestu musiać uklučacca novyja imiony. I, mahčyma, akurat niekatorych novych hierojeŭ sučasnaha biełaruskaha myśleńnia my ŭbačyli padčas uznaharodžańnia pieramožcaŭ konkursu ese «Intelektualnaja spadčyna Biełarusi: postaci, idei i kanteksty». Treciaje miesca zaniała Taćciana Urubleŭskaja-Tokier z ese «Uładzimir Furs: Biełaruś tut i ciapier», druhoje — Antoś Ułasienka z tekstam «Na druhich šlachoch». Pieramožcam konkursu ese z pracaj «A chto tam i dzie?» staŭ Michaił Baranoŭski. Usie pieramožcy atrymali kaštoŭnyja padarunki, a ich pracy buduć apublikavanyja na sajtach Latučaha ŭniviersiteta, hramadskaj kulturnickaj kampanii «Budźma biełarusami!», «Biełarusskoho žurnała», a taksama ŭvojduć u Almanach, što budzie vydadzieny naprykancy 2016 hoda. Arhanizatary jašče raz ščyra vinšujuć pieramožcaŭ!
Vierahodna, teksty pieśniaŭ Lavona Volskaha, jaki vystupiŭ z fajnym kancertam naprykancy cyrymonii, taksama mahli b uvajści ŭ jaki-niebudź śpiecyjalny raździeł novaj «Antałohii biełaruskha myśleńnia». Kali ŭsie sprečki ścichajuć, a zala hołasna śpiavaje razam — dasiahnuć takoha efiekta moža tolki sapraŭdny muzyka-myślar!
Arhanizatary ŭdziačnyja usim partnioram (Mižnarodnamu kansorcyumu «JeŭraBiełaruś», Latučamu ŭniviersitetu, hramadskaj kampanii «Budźma biełarusami!», Biełaruskamu Kalehiumu, kursam «Mova Nanova», kniharnie «Łohvinaŭ» i Instytutu palityčnych daśledavańniaŭ «Palityčnaja śfiera») i inicyjatyvam, jakija dałučylisia da praviadzieńnia «Tydnia» ŭ Minsku i rehijonach; a taksama ŭsim udzielnikam mierapryjemstvaŭ prahramy i pradstaŭnikam ŚMI za dapamohu ŭ raspaŭsiudzie infarmacyi i aŭtarskija artykuły (Eurobelarus.info, «Zaŭtra tvajoj krainy», «Novy čas», «Naša Niva», Naviny.by, Citydog.by i inšyja). Asabliva varta adznačyć hienieralnaha infarmacyjnaha partniora — niezaležny analityčny resurs «Biełarusskij žurnał», jaki zrabiŭ z nahody «Tydnia biełaruskaha myśleńnia» stolki materyjałaŭ, što na pračytańnie i ich analiz u vas pojdzie jašče nie adzin tydzień. Abaviazkova zazirnicie!:)
Čakajem vašych kamientaroŭ, refleksij na skryniu [email protected], a taksama ŭ supołcy mierapryjemstva ŭ Facebook.
Da sustrečy na intelektualnaj prastory biełaruskaha myśleńnia!
