Pradprymalniki zajavili pra hatoŭnaść pačać zabastoŭku ŭ vypadku masavych pravierak
Pradprymalniki vykazali niedavier Ministerstvu pa padatkach i zborach, uskłaŭšy na jaho adkaznaść za nastupstvy ŭ śfiery pradprymalnictva, vyklikanyja dziejańniem prezidenckaha ŭkaza № 222. Pra heta havorycca ŭ vynikovaj rezalucyi ŭdzielnikaŭ forumu pradprymalnikaŭ, praviedzienaha 3 kastryčnika ŭ Minsku respublikanskim hramadskim abjadnańniem «Pierśpiektyva».
U pracy forumu, jaki adbyŭsia ŭ Domie Maskvy, uziali ŭdzieł bolš za 180 čałaviek ź Bierazino, Barysava, Bresta, Homiela, Hrodna, Žodzina, Minska, Mahilova, Mazyra, Maładziečna i Połacka, a taksama pradstaŭniki Ministerstva ekanomiki i Ministerstva antymanapolnaha rehulavańnia i handlu.
Na dumku ŭdzielnikaŭ sustrečy, mienavita MPZ niasie adkaznaść za toje, što dziejańnie ŭkaza № 222 paciahnuła za saboj «niehatyŭnyja nastupstvy dla indyvidualnych pradprymalnikaŭ i krainy ŭ cełym, pryčyniŭšy ekanamičnuju i palityčnuju škodu».
Pradprymalniki vyrašyli pačać padrychtoŭku da praviadzieńnia čarhovaha forumu ŭ śniežni 2016 hoda, na jaki prapanavana zaprasić premjer-ministra i inšych čynoŭnikaŭ urada, pradstaŭnikoŭ zamiežnych dypłamatyčnych misij.
Udzielniki forumu taksama abviaścili ab hatoŭnaści pačać zabastoŭku i arhanizavać sieryju mitynhaŭ u miežach zakonu ŭ tym vypadku, kali kantrolna-nahladnyja orhany stanuć pravodzić masavyja pravierki indyvidualnych pradprymalnikaŭ z kanfiskacyjami i štrafami.
U vynikovym dakumiencie ŭtrymlivajecca prapanova ab raspracoŭcy prajekta zakona ab samazaniataści pradprymalnikaŭ u ramkach mikrabiźniesu. Čakajecca, što praca nad hetym dakumientam budzie najbližejšym časam abmierkavanaja na pasiadžeńni rabočaj hrupy pa pytańniach pradprymalnictva pry Ministerstvie ekanomiki.
Siońnia hałoŭnaja prablema ŭ śfiery małoha biźniesu zaklučajecca ŭ adsutnaści davieru pamiž uładami i pradprymalnikami, paviedamiŭ u miežach forumu staršynia «Pierśpiektyvy» Anatol Šumčanka. «Pradprymalniki nie ŭpeŭnienyja ŭ zaŭtrašnim dni, asabliva što da supravadžalnych dakumientaŭ, jakija jany pakazvajuć dziaržaŭnym orhanam ŭžo na praciahu hoda», — skazaŭ jon.
«Siońnia ŭsie pracujuć pa supravadžalnych dakumientach na tavary lehprama, — padkreśliŭ Šumčanka. — Ale my nie možam vybudoŭvać ułasnuju pracu, tamu što my nie viedajem, jakija zachady zrobiać padatkaviki pa tych dakumientach, jakija my siońnia pakazvajem. Da hetaha času Ministerstva pa padatkach i zborach tak i nie skazała, prymajuć jany našy dakumienty jak sapraŭdnyja ci nie. Jany mudrahielista kažuć, što, maŭlaŭ, my budziem praviarać, ale nie budziem hladzieć na tyja ci inšyja momanty».
Nahadajem, z pačatku hoda dziejničaje ŭkaz prezidenta № 222 ab pradprymalnickaj dziejnaści. Z-za jaho patrabavańniaŭ pieršyja niekalki miesiacaŭ hoda była faktyčna paralizavanaja praca IP, jakija handlujuć pradukcyjaj lohkaj pramysłovaści, bo jany mohuć handlavać tolki tymi tavarami, uviezienymi z krain Mytnaha sajuza, na jakija ŭ ich jość supravadžalnyja dakumienty. Atrymańnie takich dakumientaŭ składanaje ŭ suviazi z pazicyjaj rasijskich partnioraŭ. Sproby IP znajści parazumieńnie va ŭładaŭ byli biezvynikovymi, i blizu kanca sakavika bolšaść pradprymalnikaŭ vymušanyja byli adnavić pracu, niahledziačy na ryzyku być aštrafavanymi i pazbaŭlenymi tavaru z-za pretenzij dziaržaŭnych orhanaŭ adnosna sapraŭdnaści supravadžalnych dakumientaŭ.
Kamientary