Mižnarodnaje rejtynhavaje ahienctva Fitch Ratings adznačaje, što vyniki analizu jakaści aktyvaŭ, apublikavanyja Nacbankam Biełarusi ŭ minułym miesiacy, paćviardžajuć, što pry stresavym scenary pakazčyki dastatkovaści kapitału mnohich bankaŭ krainy źnižajucca da słabych uzroŭniaŭ.Dastatkovaść kapitału ŭjaŭlaje saboj adzin z najbolš važnych pakazčykaŭ nadziejnaści banka, jaki adlustroŭvaje jaho zdolnaść nivieliravać mahčymyja finansavyja straty za košt ułasnych krynic, nie na škodu klijentam.
Jak adznačajecca ŭ kamientary Fitch Ratings, biełaruskija banki ŭ vysokaj stupieni adčuvalnyja da niehatyŭnych tendencyj apieracyjnaha asiarodździa, takich jak zapavoleńnie ekanomiki i słabaść abmiennaha kursu. «My prahnazujem pamianšeńnie VUP Biełarusi na 2% u 2016 hodzie paśla skaračeńnia na 3,9% u 2015 hodzie. Źnižeńnie kursu biełaruskaha rubla da dołara ZŠA było istotnym: na 8% u pieršym paŭhodździ 2016 hoda paśla rezkaha padzieńnia na 56% u 2015 hodzie», — adznačajuć analityki.
U kamientary Fitch Ratings padkreślivajecca, što jakaść aktyvaŭ u bankaŭskim siektary rezka paharšajecca. Rehulatyŭnaja spravazdačnaść pakazvaje, što niepracujučyja aktyvy (try najbolš ryzykoŭnyja katehoryi) bolš čym padvoilisia, da 14,8% ad vieličyni aktyvaŭ, schilnych da kredytnaj ryzyki, na kaniec žniŭnia 2016 hoda ŭ paraŭnańni z 6,8% na kaniec 2015 hoda. Pakryćcio strat pa kredytach, na ŭzroŭni 38%, ź`iaŭlajecca nizkim, što stvaraje dla bankaŭ ryzyku značnych niečakanych strat.
«My ličym, što analiz jakaści aktyvaŭ byŭ zasnavany na bałansavych spravazdačach na kaniec 2015 hoda, jakija jašče nie pakazvali vysokich uzroŭniaŭ niepracujučych kredytaŭ. Naš ułasny stres-test zychodzić z rostu niepracujučych kredytaŭ jašče na 30% adnosna uzroŭniaŭ kanca pieršaha paŭhodździa 2016 hoda i pavieličeńnia pakryćcia strat pa kredytach da 80%. Pry takim scenary bankaŭski siektar straciŭ by 42% ad svajho rehulatyŭnaha kapitału na kaniec pieršaha paŭhodździa 2016 hoda», — robiać vysnovu analityki.
Jany taksama adznačajuć, što «Biełarusbank», najbujniejšy bank krainy, na jaki prypadaje 41% aktyvaŭ siektara, prademanstravaŭ dosyć dobryja vyniki ŭ ramkach analizu jakaści aktyvaŭ Nacyjanalnym bankam. Pry stresavym scenary jaho pakazčyk dastatkovaści kapitału skaraciŭsia tolki ŭmierana, da 17,5%, u paraŭnańni z 18,8% zhodna sa spravazdačnaściu na kaniec lipienia. Značnaja dola kredytaŭ banka vydadzienaja pazyčalnikam, jakim dajecca dziaržpadtrymka ŭ formie subsidziravańnia pracentnych stavak abo ŭ formie pahašeńnia kredytaŭ pa dziaržaŭnych harantyjach. U spałučeńni z užo vysokimi pakazčykami pakryćcia strat pa kredytach heta tłumačyć jaho bolš ustojlivyja pakazčyki dastatkovaści kapitału.
Piać bankaŭ u zamiežnaj ułasnaści, na jakija prypadaje 27% aktyvaŭ siektara i jakija ŭ asnoŭnym kantralujucca rasijskimi akcyjanierami, taksama, jak paviedamlajecca, paśpiachova prajšli praceduru pravierki jakaści aktyvaŭ. «U toj ža čas infarmacyja pra ŭpłyŭ analizu jakaści aktyvaŭ na ich pakazčyki dastatkovaści kapitału nie była apublikavanaja, što robić składanym acenku patencyjnaj uraźlivaści ich kapitalizacyi», — padkreślivaje Fitch Ratings.
Ahienctva taksama kanstatuje, što pakazčyki dastatkovaści kapitału dvuch dziaržaŭnych bankaŭ, «Bielinviestbanka» i «Biełahraprambanka», na dolu jakich prypadaje 21% aktyvaŭ siektara, i «Alfa-Banka», jaki maje rasijskaha ŭładalnika (2% aktyvaŭ siektara), źnižajucca nižej za narmatyŭnyja uzroŭni pry stresavym scenary. Rehulatar nie razhladaje hetyja banki jak «prablemnyja», bo jany ŭžo prymianiajuć miery dla zabieśpiačeńnia finansavaj ustojlivaści, uklučajučy rekapitalizacyju i pieradaču prablemnych aktyvaŭ (u vypadku dziaržaŭnych bankaŭ).
Fitch ličyć hety pieršapačatkovy analiz važnym krokam dla zabieśpiačeńnia pryniaćcia rehulataram padychodu, nacelenaha na pierśpiektyvu, pry ažyćciaŭleńni nahladu za bankaŭskim siektaram. «Nakolki my razumiejem, ułady majuć namier uklučyć vyniki analizu jakaści aktyvaŭ u svaju sistemu kiravańnia ryzykami, što pavinna dapamahčy ŭzmacnić patrabavańni da kapitału i vyrašyć niekatoryja momanty ŭraźlivaści bankaŭskaha siektara», — adznačajuć analityki mižnarodnaha rejtynhavaha ahienctva.
Nahadajem, pa inicyjatyvie Nacyjanalnaha banka Biełarusi i MVF sioleta pravodziłasia acenka jakaści aktyvaŭ dzieviaci najbujniejšych bankaŭ krainy. Vykanaŭcami pracedury acenki jakaści aktyvaŭ biełaruskich bankaŭ vystupili biełaruskija ofisy mižnarodnych aŭdytarskich kampanij KPMG, Deloitte, Ernst & Young i PKF (TAA «FBK-Bieł»).
Pry praviadzieńni acenki jakaści aktyvaŭ vykarystoŭvałasia mižnarodnaja mietadałohija, niezaležnaść acenki zabiaśpiečvałasia šlacham paćvierdžańnia vynikaŭ zamiežnymi ofisami aŭdytarskich kampanij.
«Dobry lesarub, ale sa źviazanymi rukami». Dypłamaty padsumoŭvajuć vyniki pracy zvolnienaha ministra Alejnika4
Kamientary