«Heta — idyjatyzm»: žurnalisty kamientujuć spravu Eduarda Palčysa, praces nad jakim pačynajecca zaŭtra

Zaŭtra Minski haradski sud pačnie razhladać kryminalnuju spravu aŭtara sajta 1863x.com. Eduarda Palčysa vinavaciać u raspalvańni varožaści pa prykmiecie rasavaj, nacyjanalnaj, relihijnaj, moŭnaj ci inšaj sacyjalnaj prynaležnaści (č. 1 art. 130 KK), a taksama ŭ vyrabie i raspaŭsiudzie parnahrafičnych materyjałaŭ (art. 343 KK).

Pavialičyć

Eduard byŭ zatrymany ŭ studzieni hetaha hoda ŭ Rasii, a potym pieradadzieny biełaruskim uładam. Takim čynam chłopiec prasiedzieŭ za kratami ŭžo 9 miesiacaŭ — čas, pakul išło śledstva. Cikava, što apalnyja materyjały, u vyrabie jakich vinavaciać chłopca, niezrazumiełym čynam užo daŭno źnikli ź internetu. Choć sudovaje rašeńnie pra pryznańnie ich ekstremisckimi jašče nie ŭstupiła ŭ zakonnuju siłu.

Dniami błohier Anton Matolka vykłaŭ u sieciva adcenzuravanyja skrynšoty adnaho z artykułaŭ, za jaki zaŭtra buduć sudzić Palčysa.

Pres-słužba HA «BAŽ» pacikaviłasia ŭ kaleh, što jany dumajuć pra spravu suprać Eduarda Palčysa i jakoha čakajuć vierdyktu.

Alaksandr Kłaskoŭski

— U spravie suprać Palčysa ja baču vyrazny palityčny kantekst. U artykułach na 1863x.com Eduard davaŭ davoli žorstki adkaz na ekspansiju «ruskaha śvietu», asabliva paśla aneksii Kryma Rasijaj. Što ž tyčycca abvinavačańniaŭ u vyrabie parnahrafii, to heta — standartny brudny pryjom u vypadku takich spraŭ. Zvyčajna dadatkovyja abvinavačańni ŭźnikajuć tady, kali chočuć kaho-niebudź prosta «zakanapacić» u turmu. U vačach ža biełaruskaj demakratyčnaj supolnaści i Zachadu pieraśled Palčysa — heta pakarańnie za toje, što vystupaŭ suprać impierskich zamašak Rasii.

Što tyčycca mahčymaha prysudu, to akurat žorstki prysud Palčysu, ja liču, zaraz vielmi nie vyhodny dla aficyjnaha Minska. Heta moža papsavać dalejšyja adnosiny z Zachadam u toj čas, kali Biełarusi vielmi patrebny hrošy i mahčymaści dla palityčnych manieŭraŭ u Jeŭropie. Tamu, dumaju, Eduarda Palčysa ŭsio ž pryznajuć vinavatym, bo nie moža ž sud pryznać, što čałaviek prosta tak siadzieŭ za kratami ni za što. Ale pakarańnie nie budzie źviazana z novym turemnym terminam. Mahčyma, zrobiać tak, kab abmiežavacca terminam, jaki Palčys užo adbyŭ za kratami.

Andžej Pačobut

— Heta vyklučna palityčnaja sprava. Heta bačna navat pa tym, što słuchańni pa joj zrabili zakrytymi. Kali b sud chacieŭ pakazać spraviadlivaść pracesu, možna było b u zakrytym režymie razhladać tolki niejkija častki spravy.

Ja čytaŭ materyjały sajta 1863x.com. Heta sapraŭdy vielmi vostraja reakcyja na nacisk «ruskaha śvietu», asabliva paśla padziejaŭ va Ukrainie. Artykuły Palčysa — heta adkaz na rasijski prapahandyscki nastup, ale raspalvańnia varožaści ja tam nie ŭbačyŭ. I parnahrafii tym bolš.

Vital Cyhankoŭ

— Ja naohuł vystupaju suprać isnavańnia hetaha artykuła pra raspalvańnie varožaści ŭ Kryminalnym kodeksie Biełarusi. Jość dźvie hłabalnyja tradycyi adnosna svabody vykazvańnia — amierykanskaja i jeŭrapiejskaja. U Amierycy, naprykład, nichto nikoha nie pryciahvaje da adkaznaści navat za antysiemickija publikacyi. U Jeŭropie krychu inšaja pravavaja tradycyja, asabliva jana prajaŭlajecca apošnim časam ŭ našym rehijonie. Ale, na moj pohlad, raspalvańnie jakoj-kolviek varožaści, kali niama zaklikaŭ da hvałtoŭnych dziejańniaŭ, — heta maksimum administracyjnaja adkaznaść.

Što tyčycca kankretna spravy Eduarda Palčysa, to tut ja baču absalutna vybaračnuju palityku biełaruskich uładaŭ. Bo, kali pahladzieć internet, my bačym, što mnohija ludzi značna bolš žorstka pišuć pra Ukrainu. Ale ich nichto da adkaznaści nie pryciahvaje.

Źmicier Pankaviec

— Palčysa adnaznačna asudziać, bo my dobra viedajem, jaki pracent apraŭdalnych rašeńniaŭ vynosiać biełaruskija sudy. Ale ja pierakanany, što nijakaha kryminału ŭ artykułach Eduarda nie było. 1863x.com — heta patryjatyčny sajt, pa jakim Palčys sprabavaŭ jarka, časam navat u pravakacyjnaj formie adkazvać na vykidy rasijskaj infarmacyjnaj prastory. Treba skazać, što časam Palčysu heta ŭdavałasia.

Ale za miežy zakanadaŭstva jon nie vychodziŭ. Što tyčycca parnahrafii, jakuju jon nibyta raspaŭsiudziŭ — heta naohuł, ja liču, idyjatyzm.

• 0
• 0
• 0
• 0
• 0
• 0
• 0
• 0