Achoŭniki z Mahilova jeździli na treniroŭku da rasijskaha bajevika Milčakova
U supołcy dyviersijnaj hrupy DNR «Rusič» źjaviłasia fota, dzie 14 čałaviek u kamuflažy i sa zbrojaj stajać pad čyrvona-zialonym biełaruskim ściaham. Tvary zamazanyja, kab «nie palić ludziej», jak pišuć u abmierkavańni na staroncy UKantakcie.
![](http://nnexpictures.fra1.digitaloceanspaces.com/img/w732d4webp1/photos/z_2016_10/milchakov_rusich-7x8wf.jpg.webp)
«Na minułym tydni instruktary DŠVB «Rusič» praviali kamiercyjnuju treniroŭku pa taktycy i ahniavoj padrychtoŭcy dla našych siabroŭ ź Biełarusi», — takim podpisam supravadzili fota bajaviki.
Tvary ŭdzielnikaŭ zamazanyja, adkrytyja tolki instruktarskija — u pryvatnaści, Alaksieja Milčakova, jaki viadomy svajoj žorstkaściu i ŭdziełam u vajnie na Danbasie.
Heta jon fihuravaŭ u rasśledavańni «Našaj Nivy» pra sproby vyvazu biełaruskich školnikaŭ na treniroŭki da nieanacystaŭ u Padmaskoŭje.
Ale što ž za ludzi na fota pobač ź im?
«Naša Niva» identyfikavała ich.
Praŭda, biełarusy siarod ich nie ŭsie. Naprykład, centralny čałaviek (adrazu za ściaham) — rasijanin ź Pieciarburha.
![](http://nnexpictures.fra1.digitaloceanspaces.com/img/w732d4webp1/photos/z_2016_10/ivb3duc7fvc-888s5.jpg.webp)
Ale bolšaść — biełarusy, chłopcy z Mahilova, siabry niefarmalnaha abjadnańnia «Siłavaja supołka Rusič».
Hetyja chłopcy zajmajucca achovaj roznych mierapryjemstvaŭ, naprykład, kancertaŭ, zajmajucca sportam.
![](http://nnexpictures.fra1.digitaloceanspaces.com/img/w732d4webp1/photos/z_2016_10/6x0x8n6k7i0-jig5l.jpg.webp)
«Naša Niva» źviazałasia z čałaviekam, jaki kaardynavaŭ vyjezd biełaruskaj hrupy na treniroŭku da Milčakova (pa inšaj viersii, treniroŭka adbyłasia ŭ Biełarusi).
Heta Dźmitryj Miadźviedź (proźvišča, moža być, niesapraŭdnaje) — majstar sportu pa paŭerliftynhu, vypusknik Mahiloŭskaha ŭniviersiteta imia Kulašova.
![](http://nnexpictures.fra1.digitaloceanspaces.com/img/w732d4webp1/photos/z_2016_10/lpvbnhsqvzlpmdtlpm-fxbve.jpg.webp)
Paśla daviedzienych nami faktaŭ jon nie staŭ admaŭlać, što razam ź siabrami jeździŭ da Milčakova. Chto na kaho vyjšaŭ, praŭda, nie skazaŭ, ale niekatoryja detali raspavioŭ.
«U nas bajevikoŭ niama, — skazaŭ jon. — U nas jość dobryja strajkbalisty, jakim cikava mienavita viadzieńnie boju, nabližanaha da realnaści, dla hulni. Nijakich palityčnych razmoŭ z hetaj hrupaj u nas nie viałosia, nijakich «Mahiloŭskich narodnych respublik» my stvarać nie płanujem, hetaha nie było».
![](http://nnexpictures.fra1.digitaloceanspaces.com/img/w732d4webp1/photos/z_2016_10/etqvqqddw64-hw0ct.jpg.webp)
Dźmitryj zapeŭniŭ, što padtrymlivaje terytaryjalnuju cełasnaść Biełarusi.
«Ja pa-biełarusku havaryć mahu, movu šanuju. Ni pra jaki sieparatyzm havorki nie idzie. U mianie ŭvohule šmat siabroŭ va Ukrainie, dla mianie Krym — ukrainski. Spadziajusia, što na Danbasie taksama nieŭzabavie ŭsio sucišycca, i jon stanie ŭkrainskim», — voś što skazaŭ nam hety Miadźviedź.
My spytali, što jon dumaje pra Milčakova.
«Tałkovy małady čałaviek, načytany, cikavy surazmoŭca, ja b nie skazaŭ, što jość takija zamaški, čałaviek adekvatny», — adkazaŭ Dźmitryj.
A čamu tvary na fotach zamazvali? Pavodle jahonych słovaŭ, tvary zamazanyja, kab ich nie paznali, i dla jaho zvanok z «Našaj Nivy» staŭ niečakanaściu.
«Vidać, chutka i ź inšych struktur patelefanujuć. Nu što ž, daviadziecca pahutaryć», — padsumavaŭ jon.
Jak nam raspaviali ludzi, znajomyja z hetaj tusoŭkaj, u śvietapohladzie Dźmitryja Miadźviedzia lohka zabłytacca: «Jon adnačasova za BNR, DNR, ŁNR i VKŁ».
-
Što viadoma pra źniavolenych u Biełarusi hramadzian Ukrainy, jakija siońnia niečakana zdabyli volu?
-
Łukašenka nie pavieryŭ Ryžankovu. Piatkievič vyhladaje procivahaj Krutomu. A Kruty — vialikaja zahadka
-
«Ukraina Biełarusi nie pahražaje, my vymušanyja abaraniacca». Ukrainskaja pamiežnaja słužba adkazała biełaruskaj
Kamientary