Na 840 rubloŭ (40 bazavych vieličyniaŭ) aštrafavany siabra ruchu «Za svabodu» Alaksandr Miendal, jaki byŭ zatrymany pad čas raspaŭsiudu ŭlotak pra falsifikacyi na vybarčaj akruzie Jurasia Hubareviča. Sud paličyŭ jaho vinavatym u parušeńni zakona ab ŚMI.
Pad čas pasiedžańnia Alaksandr Miendal raspavioŭ, što byŭ zatrymany pad čas razdačy ŭlotak, u jaho byli kanfiskavanyja 1640 asobnikaŭ.
Pad čas suda aktyvist ruchu «Za svabodu» pryznaŭ sam fakt razdačy ŭlotak, ale nie pryznaŭ svaju vinu. «Ja nie pryznaju, što maje dziejańni padpadajuć pra zakon «Ab ŚMI», — padkreśliŭ jon.
Jahony advakat źviarnuła ŭvahu na toje, što na ŭlotkach adsutničali prykmiety pieryjadyčnaści, akramia taho, takoha ŚMI «Abaronim svoj vybar» nie isnuje.
«Tak jak ulotka nie źjaŭlajecca ŚMI, prašu spynić spravu za adsutnaściu pravaparušeńnia», — padkreśliła advakat.
Adnak sud nie prysłuchaŭsia da hetych arhumientaŭ. Miendal byŭ pakarany pa artykułu 22.9 KoAP (Parušeńnie zakanadaŭstva ab ŚMI) na 40 minimalnych bazavych vieličyniaŭ.
«Biełaruskaje «pravasudździe» znoŭ viarnułasia da pakarańnia za razdaču infarmacyjnych materyjałaŭ. Padobnaja praktyka nie ŭžyvałasia z 2000-ch. Absurdnaść spravy — vidavočnaja», — prakamientavaŭ vynik suda staršynia ruchu «Za svabodu» Juraś Hubarevič.
Pa jahonych słovach, «paśla karotkaha pieryjadu adlihi ŭ časie parłamienckich vybaraŭ, ułady znoŭ pačali «zakručvać hajki»». «Štrafy vypisvajuć za ŭsio: vychad na vulicu, zbor podpisaŭ, raspaŭsiud ulotak. Pieradusim, cisnuć na novych aktyvistaŭ», — dadaŭ jon.
Paśla prysudu Hubarevič sam razdaŭ niekalki dziasiatkaŭ ulotak ŭ budynku i na vychadzie z suda, «kab prademanstravać, što štrafami jany nie zabaroniać nam danosić ludziam praŭdu».
