Rasieja apaviaściła AAN, što nie budzie pravodzić bambardziroŭki siryjskaha horada Alepa pa 11 hadzin u dzień na praciahu troch dzion, pačynajučy z čaćviarha, havorycca ŭ paviedamleńni arhanizacyi.
Pa słovach śpiecpradstaŭnika AAN pa Siryi Stefana de Mistury, arhanizacyja vitaje hetyja «adnabakovyja humanitarnyja paŭzy» dla evakuacyi biežancaŭ i paranienych z zony bajoŭ, adnak jany nie źjaŭlajucca pačatkam płana AAN pa spynieńni hvałtu ŭ Alepa.
Jak adznačyŭ de Mistura, nieabchodna damahčysia taho, kab bajeviki hrupoŭki «Džabchat Fatch aš-Šam» pahadzilisia pakinuć horad. Akramia taho, AAN choča atrymać harantyi, što siryjski ŭrad pieradaść kiravańnie horadam miascovaj administracyi va ŭschodnim Alepa.
Pres-sakratar prezidenta Rasii Dźmitryj Piaskoŭ paviedamiŭ žurnalistam, što padaŭžeńnie paŭzy ŭ Alepa «mahčymaje i pažadanaje, ale tolki nie ŭ tym vypadku, kali hetaja paŭza budzie vykarystoŭvacca dla ŭmacavańnia, pieraŭzbrajeńnia i pieraasnaščeńnia terarystaŭ».
Humanitarny daradca AAN Jan Ehiełand paviedamiŭ, što pieršaja partyja paranienych, jak čakajecca, budzie evakujavanaja z Alepa ŭ piatnicu.
Pa słovach Ehiełanda, AAN choča padoŭžyć humanitarnyja paŭzy da paniadziełka, bo pakul niama damoŭlenaści ab dastaŭcy praduktaŭ u abłožany horad.
Raniej paviedamlałasia, što abvieščanaja Rasijaj «humanitarnaja paŭza» u siryjskim Alepa pačała dziejničać u čaćvier z 8:00 pa Maskvie.
Pieršapačatkova mierkavałasia, što «humanitarnaja paŭza» praciahniecca tolki vosiem hadzin, adnak AAN zajaviła, što dla evakuacyi mirnych žycharoŭ z Alepa nieabchodna pa mienšaj miery 12-hadzinnaje pieramirje.
Chto taki Michaił Miachovič — siłavik, jaki viadzie kanał HUBAZiKa i adkazvaje za prabiŭ ludziej20
Kamientary