Doktar Strendž
Žanr: fantastyka, fentazi, pryhody, bajavik
Režysior: Skot Deryksan
U rolach: Bieniedykt Kambierbetč, Cilda Suintan, Mads Mikielsien, Čyvietel Edžijafor, Rejčał MakAdams, Bieniedykt Vonh, Majkł Stułbarh, Biendžamin Bret
ZŠA, 115 chv.
Adznaka: 8
Styvien Strendž — nadzvyčaj talenavity i paśpiachovy niejrachirurh. Ale aŭtamabilnaja avaryja stavić kryž na karjery — u jaho paškodžanyja ruki.
Kali miedycyna akazvajecca biezdapamožnaj (paśla niekalkich apieracyj ruki praciahvajuć dryžeć), jon źviartajecca da nietradycyjnych srodkaŭ i adpraŭlajecca ŭ Niepał.
Tam jon znachodzić staražytnych čaraŭnikoŭ, jakija nie tolki vałodajuć tajemnymi viedami i adkryvajuć byłomu doktaru novyja prastory duchu, ale i stajać na varcie Ziamli — Ciomnaje vymiareńnie moža pahłynuć hety śviet.
Niečakana dla siabie Strendž akazvajecca ŭciahnuty ŭ kanflikt dźviuch sił, i ciapier na konie staić nie tolki jaho ŭłasnyja žyćcio i karjera, ale i isnavańnie ŭsich ludziej na płaniecie.
14-ja stužka kampanii Marvel Studios, viadomaj vydatnymi ekranizacyjami komiksaŭ, uvodzić u kinasuśviet novaha supierhieroja. Upieršyniu doktar Strendž źjaviŭsia na staronkach komiksaŭ pra Čałavieka-pavuka ŭ 1963 (stvaralniki — scenaryst Sten Li i mastak Styvien Dzitko), zajmieŭšy klučavuju rolu, ale paśla pieratvaryŭsia ŭ druhasnaha piersanaža.
Jaho vychad na vialiki ekran rychtavaŭsia z 1986-ha, ale z roznych pryčynaŭ zdymki nijak nie mahli pačacca. Kančatkova kamanda dla ciapieršniaha prajekta sabrałasia tolki ŭ 2014, a na rolu hałoŭnaha hieroja zaćvierdzili brytanca Bieniedykta Kambierbetča, zorku «Šerłaka» i naminata na Oskar-2015 («Hulnia ŭ imitacyju»).
Atmaśfiera filma adsyłaje da tvoraŭ, jakija pierakulili kinasuśviet, — «Matrycy» Vačoŭski, filmaŭ Stenli Kubryka.
Zhadvajucca taksama i niekatoryja značnyja filmy apošnich hadoŭ — «Pačatak» i «Interstełar» Nołana. Kancepcyja čaraŭnictva zapazyčanaja i z tvoraŭ japonskaha režysiora Chajao Mijadzaki.
Matyvy paralelnych śvietaŭ tłumačacca z punktu hledžańnia roznych kancepcyj viery i navuki, ale hałoŭnaja rysa filmaŭ Marvel — zabaŭlalnaść.
Piersanažy, choć i dziejničajuć realijach niekalkich vymiareńniaŭ, spaborničajuć u skryŭleńni prastory i času, karystajucca i sučasnymi dabrotami cyvilizacyi. Pastanoŭka bojek, stvareńnie iluzij prastory — vykarystanyja śpiecefiekty najvyšejšaj jakaści.
Stužka zachoplivaje ź pieršych kadraŭ.
Film vykanany va ŭschodniaj estetycy. Niekatoryja zdymki prachodzili ŭ Niepale.
Sam Bieniedykt Kambierbetč pravioŭ hod u Dardžylinhu (Indyja), na dobraachvotnaj asnovie pracujučy vykładčykam anhlijskaj movy ŭ budysckim manastyry. Heta akazała vielizarny ŭpłyŭ na ŭsio jaho žyćcio i ŭ padrychtoŭcy da roli Strendža jon abapiraŭsia na hety dośvied.
«Duchoŭnaje vymiareńnie — heta jak raz toje, što mianie cikavić, — raskazaŭ akcior. - Heta častka majho ŭłasnaha žyćcia. Ja šmat miedytuju. Heta vielmi karysny zaniatak, z dapamohaj jakoha ja mahu supakoicca, adpačyć ad nasyčanaha žyćcia, zasiarodzicca na tym, kab stać bolš dobrym i ŭvažlivym da inšych ludziej».
Rola Starejšyny, hałoŭnaha čaradzieja Ziamli, dastałasia Cildzie Suintan. Chod nieardynarny, bo ŭ komiksach piersanaž hety byŭ starcam. Adnak oskaranosnaja brytanskaja aktrysa, viadomaja samymi raznapłanavymi rolami, vydatna ŭpisałasia ŭ siužet. Jašče adnym kaleham na zdymačnaj placoŭcy staŭ Čyvietel Edžyjafor, partnier Kambierbetča pa zdymkach u «12 hadoŭ rabstva» (2013). Rolu admoŭnaha piersanaža vykanaŭ dacki akcior Mads Mikiensien (sieryjał «Hanibał», 2013-2015).
Doktar Strendž admietny tym, što nie atrymlivaje svaju siłu paśla navukovych ekśpierymientaŭ abo niejkich mutacyj. Jon čałaviek navuki, jaki traplaje ŭ zusim inšy suśviet, spaścihaje svabodu duchu, nie zacisnutaha ŭ abałonku fizičnaha śvietu.
Hety hieroj - adzin z najmacniejšych u komiksavym suśviecie.
Jakim jon stanie ŭ kiniematahrafičnym suśviecie - možna tolki zdahadvacca, adnak źjaŭleńnie piersanaža ŭ «Mściŭcach» užo anansavanaje.
Kamientary