Ułady Zielenahradska ŭ Kalininhradskaj vobłaści Rasii pryznali načalnika adździeła zimovych vidaŭ sportu Ministerstva sportu i turyzmu Biełarusi Andreja Fomačkina hanarovym žycharom horada.
Kiraŭnik rehijona Anton Alichanaŭ uručyŭ biełaruskamu spartovamu čynoŭniku miedal, pryśviečany 70-hodździu Kalininhradskaj vobłaści, pišuć «Iźviestija». Akramia taho ŭłady Kalininhradskaj vobłaści padaryli ŭsioj biełaruskaj kamandzie paralimpijcaŭ siertyfikat na letni adpačynak na rasiejskim uźbiarežžy Prybałtyki.
Fomačkin naviedaŭ Kalininhradskuju vobłaść na pačatku listapada. Jon raspavioŭ, što na Paralimpijadu biełarusy nieśli piać (rasiejskich) ściahoŭ, kab była ŭpeŭnienaść, što padymuć choć niejki ź ich, piša ok-inform.ru. Adzin z tych ściahoŭ Fomačkin padaryŭ Alichanavu.
Darečy, raniej paviedamlałasia, što rasijanie padaryli Fomačkinu kvateru ŭ Padmaskoŭi.
Zielenahradsk — kurortny haradok pry samym pačatku Kuršskaj kasy. Da 1946 nazyvaŭsia Kranc. U Zielenahradsku žyvie 14,8 tys. čałaviek.
