Viadomy aŭstryjski skrypač i dyryžor Rajner Chonek pryvioz z saboj u Minsk skrypku Stradyvary 1725 hoda vyrabu, rynkavy košt jakoj składaje niekalki miljonaŭ dalaraŭ. 10 listapada muzykant vystupić na hała-kancercie salistaŭ Vienskaj opiery ŭ vialikaj zale Pałaca Respubliki razam z Prezidenckim arkiestram RB.
Vałodaje skrypkaj admysłovy fond Aŭstryjskaha nacyjanalnaha banka, jaki kuplaje pieršakłasnyja instrumienty i daje ich u karystańnie muzykam najlepšych kalektyvaŭ Aŭstryi. Rajner Chonek užo bolš za 30 hadoŭ źjaŭlajecca adnoj ź pieršych skrypak Vienskaha fiłarmaničnaha arkiestra i Vienskaj opiery, vystupaŭ jak instrumientalist i dyryžor u dziasiatkach krain śvietu.
— Hetaja skrypka nazyvajecca Chaconne, u XIX stahodździ joj vałodaŭ viadomy aŭstryjski skrypač i kampazitar Jozef Joachim. Pavodle lehiendy, jaje nazvali tak tamu, što jon vielmi lubiŭ vykonvać na joj adnajmienny tvor Bacha. Dla mianie vialiki honar i zadavalnieńnie hrać na hetym instrumiencie, — raspavioŭ Rajner Chonek užo ŭ Miensku.
Rajner Chonek pačaŭ hrać na skrypcy Chaconne litaralna miesiac tamu. Da hetaha ŭ jaho rasparadžeńni byŭ inšy instrumient Stradyvary — ex-Haemmerle 1709 hoda vyrabu. Aproč vystupu ŭ jakaści instrumientalista, Rajner Chonek budzie ŭ šerahu tvoraŭ dyryžyravać Prezidenckim arkiestram Respubliki Biełaruś. Užo prajšła pieršaja sumiesnaja repietycyja.
U hała-kancercie taksama voźmuć udzieł Jorh Šnajder (tenar) i Marta Pališot (saprana), jakija vykanajuć frahmienty z apieret «Latučaja myš» (Štraŭs), «Karaleva Čardaša» (Štraŭs), «Kraina ŭśmiešak» (Lehar) i inšych tvoraŭ.
Biełaruś prysabiečyła častku terytoryi Ukrainy dla ŭłasnych patreb? 2
Kamientary