U razmovie sa Svabodaj jana nie vyklučyła takuju mahčymaść.
Lidzija Jarmošyna paviedamiła:
— Adkazvać na vašaje pytańnie, ci jość u mianie žadańnie pracavać dalej, ja nia budu. Bo, ščyra kažučy, ad hetaha, mabyć, mała što zaležyć. Tut treba kazać pra žadańnie inšaha čałavieka — ci choča jon i nadalej bačyć mianie na čale Centralnaj kamisii pa vybarach i praviadzieńni respublikanskich referendumaŭ?
Našy paŭnamoctvy skončacca 20 śniežnia 2016 hodu. Da hetaha terminu pavinna prajści ratacyja Centravybarkamu i zaćviardžeńnie jaho novaha składu. Pryčym heta tyčycca absalutna ŭsich 12 čałaviek, jakija ŭvachodziać u CVK. Navat miesca sakratara CVK Łazavika, jaki niadaŭna pamior, volnaje nia tolki faktyčna, ale i farmalna. Bo Mikałaj Ivanavič pierad tym, jak syści ŭ adstaŭku, skłaŭ ź siabie paŭnamoctvy ŭ CVK. Realna ciapier pracujuć 11 čałaviek, a ŭ novym składzie ich budzie, jak i raniej, 12. Paviercie mnie, heta niašmat.
— Zvyčajna kolkaść asobaŭ u padobnych strukturach niacotnaja, ale, moža, vy sapraŭdy majecie dva hałasy, jak kažuć niekatoryja?
— Heta tolki častkova dakładnaja infarmacyja. Staršynia CVK maje dvajny hołas vyklučna ŭ adnoj sytuacyi, kali kamisija hałasuje paroŭnu: 6 — «za» i 6 — «suprać». Va ŭsich astatnich vypadkach moj hołas ničym nie adroźnivajecca ad hałasoŭ inšych čalcoŭ.
U nas pałovu składu CVK nazyvaje prezydent, druhuju pałovu — Saviet Respubliki. Tut poŭny parytet, adsiul i ličba 12.
— Najbližejšyja vybary, jakija nas čakajuć, heta miascovyja?
— Tak. Krajni termin ich praviadzieńnia — luty 2018 hodu. Kali mianie nie padvodzić pamiać, to nie paźniej za 26 lutaha. A heta aznačaje, što sama vybarčaja kampanija pačniecca prykancy nastupnaha, 2017 hodu.
— Ci možna čakać źmienaŭ u vybarčym zakanadaŭstvie da hetaha času?
— Vy viedajecie, heta toj vypadak, kali ja nie mahu dakładna vam adkazać. I nie tamu, što źmianieńniaŭ nia treba čakać. Najchutčej, jany buduć, bo ŭ Centralnaj kamisii jość svaje ŭłasnyja plany, jość abaviazacielstvy pierad ABSE. Ale kali vy ŭvažliva słuchali słovy prezydenta, to niadaŭna jon havaryŭ pra mahčymaść karekciroŭki Kanstytucyi. I kali heta sapraŭdy jość u planach kiraŭnika dziaržavy, to nichto nia budzie mianiać vybarčaje zakanadaŭstva raniej za karekciroŭku Asnoŭnaha zakonu.
— Ale ž dla praviadzieńnia miascovych vybaraŭ, patreby mianiać Kanstytucyju, mabyć, niama?
— Dla miascovych, tak. Tut absalutna ŭsie źmieny možna zrabić, nie kranajučy Kanstytucyju. A voś pry praviadzieńni parlamenckich i prezydenckich vybaraŭ Asnoŭny zakon sapraŭdy treba karektavać, Adnak jakija kankretna źmieny choča zrabić u Kanstytucyi kiraŭnik dziaržavy, ja nia viedaju.
***
«Svaboda» nahadvaje, što 7 kastryčnika 2016 hodu Alaksandar Łukašenka zajaviŭ, što naśpieŭ čas pravieści analiz Asnoŭnaha zakonu krainy: «Pasprabujem padyści da hetaha pytańnia z roznych bakoŭ. Akuratna, kab nie zrabić horš. Źjavilisia novyja prablemy, vykliki Dy i čas, napeŭna, patrabuje čahości novaha. I pačynać treba z hałoŭnaha, kali my advažymsia na heta. Nam treba stvaryć hrupu mudracoŭ, jurystaŭ, jakija praanalizujuć Asnoŭny zakon. I kali treba budzie, my na heta pojdziem».
Paśla hetaha eksperty zahavaryli pra toje, što parlamenckija vybary ŭ Biełarusi mohuć nadalej pravodzicca pa źmiašanaj systemie, a nia tolki pa adnamandatnych akruhach, jak ciapier. A termin paŭnamoctvaŭ prezydenta mohuć pavialičyć z 5 da 7 hadoŭ.
Kamientary