Šou na Malcie adbudziecca 20 listapada ŭ Mižziemnamorskim kanfierenc-centry.
Ab hetym stała viadoma 14 listapada ŭ čas žarabjoŭki na ŭračystaj cyrymonii adkryćcia forumu, jakaja prajšła ŭ stalicy Malty horadzie Valeta ŭ Manoel Theatre, pieradaje BiełTA.
U čas uračystaj cyrymonii adkryćcia konkursu delehacyi z 17 krain - udzielnic konkursu prajšli pa čyrvonaj dyvanovaj darožcy, na jakoj ich sustrakała viadomaja maltyjskaja aktrysa, śpiavačka i tancoŭščyca Taryn Mamo Cefaj.
Pradstaŭnik Biełarusi Alaksandr Minionak, a taksama dzieci ź viciebskaha šou-baleta «Siensacyja» (Kirył Miachoŭski, Uładzisłaŭ Bašmietaŭ, Valeryja Ilčanka i Karyna Vasileŭskaja) vyjšli na čyrvonuju darožku razam z kiraŭnikom delehacyi Volhaj Sałamachaj.
U mini-intervju Saša pryznaŭsia viadoŭcy, što muzyka — heta jaho žyćcio, a taksama jon zachaplajecca roznymi vidami sportu.
Paśla taho jak kožny z kankursantaŭ prajšoŭ pa darožcy, cyrymonija pieramiaściłasia ŭ zału teatra, dzie adbyłasia žarabjoŭka. Dzieci ciahnuli šary z numarami łož, u jakich pieraapranutyja viaščalniki abjaŭlali, u pieršaj ci ŭ druhoj pałavinie vykanaŭcu daviadziecca vyjści na scenu finalnaha šou. Saša vyciahnuŭ ščaślivy numar 13 i trapiŭ u pieršuju pałovu.
Paradak vystupleńniaŭ u kožnaj hrupie vyznačać arhanizatary. U hetym hodzie arhanizatary (maltyjskaja hramadskaja telekampanija PBS) raspracavali kancepcyju fiestyvalnaha tydnia. Centram jaje źjaŭlajecca stalica krainy horad Valeta, jaki dla kožnaha z udzielnikaŭ raskryjecca za niekalki dzion znachodžańnia na Malcie.
Taksama ŭ hetym hodzie pieramožcu vyznačać try składy žury: nacyjanalnaje dziciačaje i darosłaje žury, jakija buduć hałasavać u krainach - udzielnicach konkursu ŭ čas hienieralnaj repietycyi, a taksama prafiesijnaje žury, jakoje budzie hałasavać niepasredna ŭ čas šou na Malcie. Jano adbudziecca 20 listapada ŭ Mižziemnamorskim kanfierenc-centry. Pramuju tranślacyju mižnarodnaha dziciačaha konkursu pieśni «Jeŭrabačańnie-2016» buduć vieści telekanały «Biełaruś 1» i spadarožnikavy «Biełaruś 24».
Vyniki hałasavańnia ad Biełarusi abjavić pradstaŭnik krainy na dziciačym «Jeŭrabačańni-2015» Rusłan Asłanaŭ, jaki ciapier taksama znachodzicca na Malcie. Kamientavać konkurs budzie viadoŭca Ahienctva telenavin Biełteleradyjokampanii Julija Piarcova.
Kamientary