«Listapad» skončyŭsia na minułym tydni, ahułam padčas kinafiestyvalu pakazali kala 150 filmaŭ. Na niekatoryja ź ich kvitki raskuplali imhnienna (naprykład, na film Dołana abo «Pieciarburh. Tolki pa kachańni»), tamu piać filmaŭ vyrašyli pakazać jašče raz, kab nichto nie kryŭdziŭsia.
«Pieciarburh. Tolki pa kachańni»
Režysiory: Aŭdoćcia Śmirnova, Renata Litvinava, Aksana Byčkova, Aksińnia Hoh, Natalla Nazarava, Natalla Kudrašova, Hanna Parmas
Pakazy: 12—20 listapada ŭ «Pieramozie»
Heta siem historyj, źniatych režysiorami-žančynami, pra ramantyčnyja pryhody ŭ Pieciarburhu. Siarod režysioraŭ — Renata Litvinava, siarod akcioraŭ, naprykład, Palina Kuciepava i Michaił Bajarski. Film adkryvaŭ «Listapad», tamu zrazumieła, čamu na jaho kvitki tak chutka raskupili.
«Ja, Denieł Błejk»
Režysior: Kien Łoŭč
Pakazy: 24 listapada — 7 śniežnia ŭ «Rakiecie»
Film Kiena Łoŭča — pra supraćstajańnie prostaha čałavieka i dziaržaŭnaj mašyny. U filma — Załataja palmavaja halina — 2016 Kanskaha MKF i pryzy hladackich simpatyj na MKF u Łakarna i San-Siebaśćianie.
«Ciahnik u Pusan»
Režysior: Jon San-cho
Pakazy: 24—30 listapada ŭ «Centralnym»
Najlepšy zombi-chorar hoda. Zatarmožany top-mieniedžar biare na paŭdnia adhuł, kab zvazić dačku na dzień naradžeńnia ŭ hości da mamy. Vahon užo adychodzić, i tut u apošni momant u jaho zaskokvaje pakamiačanaja i spužanaja žančyna, jakaja zamykajecca ŭ prybiralni ŭ nadziei, što palahčeje, ale palohka nie prychodzić, a navat naadvarot — jana zahryzaje pravadnicu i kidajecca jeści pasažyraŭ. Dziela padobnych filmaŭ ludzi, jak praviła, u kinateatry naohuł i chodziać.
«Heta prosta kaniec śvietu»
Režysior: Ksav́je Dałan
Pakazy: 5—18 śniežnia ŭ «Pieramozie»
Małady mužčyna viartajecca ŭ baćkoŭski dom paśla doŭhaj adsutnaści, kab paviedamić pra svaju śmiarotnuju chvarobu, ale vyśviatlaje, što maci, bratu i siostram hetuju infarmacyju nie tak i prosta danieści. Ludzi, jakija bačyli choć by adzin z papiarednich filmaŭ Dałana, viedajuć, što navat samyja mocnyja siužetnyja pramaški ŭ jaho pracach vykupalisia enierhijaj i emacyjnaj niastrymnaściu. U «Kancy śvietu» niebaschił jak zaŭsiody isteryčnaha siužetu padtrymlivajuć da taho ž pieršakłasnyja francuzskija zorki — Viensan Kasel, Maryjon Katyjar i Leja Sejdu.
«Nieviadomaja»
Režysior: Žan-Pjer i Luk Dardeny
Pakazy:19—31 śniežnia ŭ «Pieramozie»
U dom žančyny-chirurha hrukajecca nieviadomaja, ale pakolki čas užo nie pryjomny, dźviery taja adkryvaje tolki na nastupny dzień palicyi, jakuju cikavić lubaja infarmacyja pra žyćcio da taho momantu ŭžo miortvaha čałavieka. Padumaŭšy, žančyna sama biarecca za rasśledavańnie. Čarhovy film žyvych kłasikaŭ bratoŭ Darden i, jak adnadušna pieradaje presa, adzin z samych słabych. To bok nie idealnaja paetyčnaja prytča, jakaja składvajecca z kalejdaskopa drobnych sumnych detalaŭ, a prosta vydatny film ab pošuku siabie i ŭsialakim takim.
Kamientary