Financial Times uklučyŭ troch biełarusaŭ u śpis 100 inavacyjnych lidaraŭ novaj Jeŭropy
Troje biełarusaŭ trapili ŭ štohadovy śpis 100 lepšych i samych jarkich pradstaŭnikoŭ krain Centralnaj i Uschodniaj Jeŭropy. Lepšymi biełarusami 2016 hoda składalniki śpisu nazvali Jaŭhiena Niaŭhienia, Kiryła Čykiejuka i Arcioma Stavienku, paviedamlaje TUT.BY.
Prajekt New Europe 100 nakiravany na padtrymku inavacyjnaj dziejnaści ŭ Centralnaj i Uschodniaj Jeŭropie. Śpis składajecca treci hod zapar fondam Res Publica, Google, Mižnarodnym Vyšahradskim fondam i Financial Times u supracoŭnictvie ź inšymi arhanizacyjami hetych krain.
U śpis traplajuć ludzi i arhanizacyi, dziejnaść jakich viadzie da źmienaŭ u hramadstvie, palitycy ci biznesie, i jakija vykarystoŭvajuć inavacyi i novyja padychody da vyrašeńnia isnujučych prablem.
Jaŭhien Niaŭhień, suzasnavalnik Masquerade, uklučany ŭ śpis za dasiahnieńnie hłabalnaha pośpiechu. Dadatak MSQRD, jaki jon stvaryŭ razam ź Siarhiejem Hančarom, u sakaviku kupiŭ amierykanski IT-hihant Facebook.
Biełarusy Arciom Stavienka i Kirył Čykiejuk patrapili ŭ 100 inavacyjnych lidaraŭ za toje, što «znoŭ vynajšli koła». U 2015 hodzie ich prajekt Kino-mo pieramoh u konkursie startapaŭ kampanii brytanskaha miljardera Ryčarda Brensana Virgin Media. A sioleta biełaruskija raspracoŭščyki padpisali damovu z amierykanskim miljarderam Markam Kjubanam, u inviestycyjnaje partfolia jakoha ŭvachodzić bolš za 50 kampanij.
Usiaho za try hady vydańnia śpisu ŭ jaho ŭklučali imiony siami biełarusaŭ. Letaś heta byli Andrej Chrapavicki, stvaralnik resursaŭ electby.org i Westki.info, i Daniła Patapaŭ, adzin z raspracoŭščykaŭ mabilnaha prykładańnia Battle Me, jaki dazvalaje zapisvać pieśni, napiavajučy ich u telefon.
A ŭ 2014 hodzie inavacyjnymi biełarusami pa viersii składalnikaŭ rejtynhu stali stvaralnik World of Tanks Viktar Kisły i Iryna Vidanava, suzasnavalnik CityDog.by.
Kamientary