Pavodle danych Nacyjanalnaha statystyčnaha kamiteta, kolkaść stratnych arhanizacyj u studzieni—vieraśni 2016 hoda ŭ paraŭnańni z takim ža letašnim pieryjadam vyrasła z 1.405 da 1.592, abo na 13,3%, a ich udzielnaja vaha — z 18,6% da 21%. Pra heta paviedamlaje BiełaPAN.
Čysty prybytak ŭsich arhanizacyj skłaŭ 3 młrd 657,7 młn rubloŭ, što na 18% bolš, čym u studzieni—vieraśni 2015 hoda. Prybytak ad padatkaabkładańnia skłaŭ 4 młrd 981,8 młn (na 11,8% bolš).
Prybytak ad realizacyi źniziŭsia na 1,7% da 9 młrd 388,9 młn rub.
Rentabielnaść prodažu za studzień—vierasień skłała 7,4% suprać 8,3% za taki ž pieryjad 2015 hoda, rentabielnaść realizavanaj pradukcyi — 9,3% suprać 10,4%.
Vyručka ad realizacyi pradukcyi, tavaraŭ, rabot, pasłuh arhanizacyj krainy ŭ ciapierašnich cenach skłała 126 młrd 505,8 młn rubloŭ, abo na 9,6% bolš, čym za studzień—vierasień 2015 hoda.
Sabiekošt realizavanaj pradukcyi, tavaraŭ, rabot, pasłuh za studzień—vierasień 2016 hoda pavialičyŭsia na 10,5% da 101 młrd 111,1 młn rub.
U pasłańni da biełaruskaha naroda i parłamienta 21 krasavika Alaksandr Łukašenka nazvaŭ źnižeńnie ŭsich vidaŭ vydatkaŭ na vytvorčaść i realizacyju pradukcyi stratehičnym napramkam pavyšeńnia kankurentazdolnaści ekanomiki. Jon padkreśliŭ, što pierad dziaržaŭnymi orhanami pastaŭlena zadača zabiaśpiečyć źnižeńnie sabiekoštu pradukcyi na 25%. «Usiaho tolki na 25%, a ŭ tych krainach, ź jakimi my kankuryrujem, sabiekošt pradukcyi pry značna bolš vysokich vydatkach na enierharesursy i inšaje značna nižejšy, čym u nas», — dadaŭ aficyjny lidar.
15 listapada na pasiadžeńni Savieta ministraŭ premjer-ministr Andrej Kabiakoŭ padkreśliŭ, što zadača, praduhledžanaja ŭkazam № 78 ab źnižeńni sabiekoštu pradukcyi, pa vynikach 9 miesiacaŭ nie vykonvajecca. Sabiekošt realizavanaj adukcyi za 9 miesiacaŭ vyras na 10,5%. «Vyraśli zatraty na vytvorčaść pradukcyi ŭ arhanizacyjach Minbudarchitektury — plus 1,2%, Biełnaftachima — plus 6,4%, Biellespapierprama — plus 0,1%», — adznačyŭ jon.
Pavodle jaho słoŭ, kolkaść stratnych arhanizacyj na 13% vyšejšaja, čym u minułym hodzie na 1 kastryčnika. Ale suma čystaj straty stratnych arhanizacyj źnižana na 40%, a čystaja strata na adnu arhanizacyju skaraciłasia amal udvaja (1 młn rubloŭ suprać 1,8 młn u 2015 hodzie).
Kamientary