Kondruś, trapiŭšy ŭ kletku ŭ zale suda, amal adrazu loh na padłohu.
Praces pa spravie, pa vialikim rachunku, tak i nie pačaŭsia jak śled. Sudździa Śviatłana Bandarenka nie paśpieła abvieścić skład suda, jak vyrašyła zrabić pierapynak — Uładzimir Kondruś, trapiŭšy ŭ kletku, zrabiŭ sabie na padłozie impravizavany łožak z ułasnaha vierchniaha adzieńnia i loh na jaho, zakłaŭšy ruki za hałavu.
Razmova z advakatam plonu nie dała — Kondruś praciahvaŭ lažać «u znak pratestu suprać svajho kryminalnaha pieraśledu», jak skazaŭ jaho advakat Vadzim Mušynski. Sudździa vyrašyła vykłkikać chutkuju, kab pravieryć, što lažańnie nie zaležyć ad stanu zdaroŭja abvinavačanaha.
Uračy zaćvierdzili, što stan Kondrusia prymalny. Viarnuŭšysia ŭ kletku paśla ahladu, Kondruś iznoŭ loh na padłohu, a praz paru chvilinaŭ i ŭvohule paspravaŭ uskryć sabie vieny. Jaho spynili milicyjanty, vyvieli z zały suda. Sudździa Bandarenka pryznačyła Kondrusiu psichołaha-psichijatryčnuju ekśpiertyzu — i sud skončyŭsia.
Baćki Kondrusia, u jakich da hetaha było tolki adno spatkańnie z synam, jaho tak i nie pabačyli. Ich vyklikali jak śviedkaŭ, tamu jany siadzieli pad dźviaryma zali suda. A da vykliku śviedkaŭ u pracesie spravy tak i nie dajšli.
Padrabiaźniej čytajcie ŭ anłajn-tranślacyi, jakuju «Naša Niva» viała z zały suda:
10:00
Siońniašniaje pasiadžeńnie budzie vieści sudździa Śviatłana Bandarenka.
Na pracesie praduhledžanyja nadzvyčajnyja miery biaśpieki. Uvachod adbyvajecca praz ramku mietałašukalnika, usich pilna abšukvajuć i zdymajuć na videa. Partatyŭnaja videakamiera pryšpilena navat da kurtki adnaho ź milicyjantaŭ u cyvilnym, jaki prahladaje asabistyja rečy tych, chto pryjšoŭ na praces.
Na praces pryjšli palityki Mikałaj Statkievič z žonkaj Marynaj Adamovič, Pavieł Sieviaryniec i błohier Eduard Palčys.
Na sud pryjšli Mikoła Statkievič i Pavieł Sieviaryniec.
10:30
Praces pačynajecca.
«Słava hieroju!» — vykliknuŭ Statkievič, kali Kondrusia ŭviali ŭ zału.
Tak siońnia vyhladaje Uładzimir Kondruś.
U svaju čarhu, Kondruś, trapiŭšy ŭ kletku ŭ zali suda, adrazu zrabiŭ sabie na padłozie impravizavany łožak z ułasnaha vierchniaha adzieńnia i loh na jaho, zakłaŭšy ruki za hałavu.
Sudździa Bandarenka adrazu ž abviaściła 10-chvilinny pierapynak, kab advakat Mušynski pahavaryŭ z Kondrusiem pra jaho pavodziny. Adnak paśla karotkaj razmovy Kondruś viarnuŭsia na svoj «łožak».
Kondrusiu pahražaje źniavoleńnie za «ŭdzieł u masavych biesparadkach».
11:00
Takim čynam prajšło kala 20 chvilin. Ničoha nie źmianiłasia: Kondruś lažyć na padłozie, advakat Mušynski siadzić za stałom. Sudździa adsutničaje, niahledziačy na toje, što pierapynak płanavaŭsia 10-chvilinny.
Tym časam Pavieł Sieviaryniec pajšoŭ «u narod».
«Pałova biełaruskaha narodu tak lažyć, — abviaściŭ jon milicyjantam. — A vy heta achoŭvajecie!».
Na milicyjantaŭ jaho pramova anijak nie paŭździejničała.
11:00
Padniać Kondrusia pasprabavaŭ i Mikoła Statkievič.
«Uładzimir, zachvareješ, idzi na łaŭku prylaž!» — paraiŭ jon. Ale Uładzimir nie ŭstaŭ.
11:05
Narešcie viarnułasia sudździa Bandarenka.
«Vy možacie štości skazać? Jakija prablemy sa zdaroŭjem?» — pacikaviłasia jana ŭ Kondrusia.
U adkaz — maŭčańnie.
Advakat uzhadaŭ pra toje, što Kondruś u SIZA znachodzicca pad nahladam miedykaŭ. Ale asabista jamu, zdajecca, abvinavačany na zdaroŭje nie skardziŭsia.
Sudździa abviaściła jašče adzin pierapynak — vyrašyli vyklikać Kondrusiu chutkuju dapamohu.
Nieviadoma, što ź im. Ale, va ŭsiakim vypadku, vyhladaje heta jak śviadomy pratest, a nie jak nastupstvy chvaroby.
Usich vyvieli z zały.
«Ja ciabie vielmi lublu!» — vyhuknuła Uładzimiru jaho siastra. Toj nie varuchnuŭsia.
11:15
Tym časam baćki Kondrusia čakajuć u faje — jany vystupajuć jak śviedki i nie mohuć prysutničać na pracesie, pakul ich nie vykličuć.
Uładzimir Raścisłavavič i Halina Vasiljeŭna Kondrusi — baćki Uładzimira.
11:30
Advakat Mušynski paćvierdziŭ, što Kondruś lažyć na padłozie nie praz prablemy sa zdaroŭjem.
«Jon mnie skazaŭ, što heta pratest, — paviedamiŭ «Našaj Nivie» Mušynski. — Kondruś pratestuje suprać svajho kryminalnaha pieraśledu».
Prahnazavać, čym skončycca sprava, Mušynski nie rašyŭsia.
11:37
Pryjechała chutkaja. Daktary ŭ zale suda.
11:45
Žurnalistaŭ puścili ŭ zalu suda. Kletka pustaja — Kondrusia niama.
12:00
Uvodziać Kondrusia.
Sudździa:
«Pa stanie zdaroŭja Uładzimir Kondruś moža udzielničać u pracesie».
A sam abvinavačany tym časam iznoŭ lahaje na padłohu.
Sudździa Bandarenka robić jamu zaŭvahu i pahražaje vydalić z pasiadžeńnia. Toj nie reahuje.
«Vieny reža!» — vyhuknuŭ milicyjant.
Milicyja ŭlacieła ŭ kletku. Bačna, što Kondruś čymści čyrkaje pa ruce. Milicyjanty trymajuć jaho za ruki.
U zale panika — svajaki Kondrusia lamantujuć. Milicyja kryčyć: «Pakińcie, usie, zału!»
Sieviaryniec kryčyć: «Milicyja, vy dapamahajecie bandytam!»
12:11
«Boža, boža, jakija źviary!», — płača siastra Kondrusia. Statkievič adhavorvaje jaje iści da baćkoŭ abvinavačanaha, bo surjoznyja paškodžańni jon sabie nanieści nie paśpieŭ. Sieviaryniec praciahvaje kryčać štości ŭ bok milicyi.
Płača i ciotka Kondrusia, i navat Maryna Adamovič, žonka Statkieviča.
Prakuror paśmichnułasia, kali vychodziła z zały.
«Čamu vy śmiajeciesia? Kali b takoje adbyłosia z vašym dziciom?», — prakryčała joj u śpinu siastra Kondrusia.
12:18
Tym časam Sieviaryniec prapavieduje milicyjantam:
«Prychodźcie damoŭ, maliciesia, a potym biarycie čysty arkuš papiery i pišycie raparty ab zvalnieńni. Padumajcie, kamu vy słužycie!».
Milicyja zajaŭlaje:
«Abvinavačanamu akazali miedycynskuju dapamohu, jaho žyćciu ničoha nie pahražaje».
Milicyja i supracoŭniki suda zaklikajuć usich vyjści z zały. Nichto nie reahuje. Svajaki Kondrusia zajaŭlajuć, što buduć čakać sudździu.
Śviatłana Bandarenka, sudździa, vyjšła, kali vyvieli Kondrusia.
12:40
Ludzi praciahvajuć siadzieć u zale. Sudździa Bandarenka tak i nie vyjšła. Aficyjna pierapynak nie abvieščany.
13:00
Sakratary kažuć, što abvieščany pierapynak. Ale ničoha nie mianiajecca — ludzi pa-raniejšamu siadziać u zale. Sudździa tak i nie vyjšła. Ci praciahniecca siońnia pasiadžeńnie, nieviadoma.
13:06
Sudździa viartajecca. Pasiadžeńnie praciahniecca biez Kondrusia, jaki «vydaleny za parušeńnie paradku». Sieviaryniec i Statkievič demanstratyŭna sychodziać.
Sudździa Bandarenka vyrašaje pryznačyć Kondrusiu psichołaha-psichijatryčnuju ekśpiertyzu.
Pasiadžeńnie praciahniecca, kali buduć viadomyja vyniki. Heta značyć, na siońnia praces skončany.
Darečy, baćki Kondrusia syna tak i nie pabačyli - da śviedkaŭ siońnia sprava nie dajšła. Uvieś čas jany tak i prasiadzieli pad załaj suda.
* * *
Nahadajem, što žychar pasiołka Rudziensk Uładzimir Kondruś 1977 hoda naradžeńnia byŭ uziaty pad vartu 14 červienia ŭ miežach papiaredniaha rasśledavańnia za jaho mierkavany ŭdzieł u padziejach kala Doma ŭrada padčas vybaraŭ prezidenta ŭ 2010 hodzie. Jon abvinavačvajecca pa artykule 293 Kryminalnaha kodeksa «Masavyja biesparadki», pa jakim u 2011 hodzie było asudžana 49 čałaviek, mnohija z pazbaŭleńniem voli na roznyja terminy. Na čas śledstva jon utrymlivajecca ŭ SIZA №1 Minska.
Baćki, siastra i advakat Uładzimira nie mohuć raspavieści ŚMI padrabiaznaści spravy — jany dali padpisku ab nierazhałošvańni.
Sam Uładzimir amal dva miesiacy admaŭlaŭsia ad ježy, paśla čaho stan jaho zdaroŭja mocna pahoršaŭ: jon nie moh navat samastojna chadzić.
Pravaabaroncy pryznali Uładzimira Kondrusia palitviaźniem.
Baćki Uładzimira Kondrusia saromiejucca prasić ab finansavaj dapamozie, ale apłočvać advakata piensijanieram niaprosta. Kali chtości zachoča dapamahčy Kondrusiam — kantakty baćkoŭ jość u Redakcyi «Našaj Nivy» ([email protected]).
