Daškievič sudziŭsia z amapaŭcami, ale… Jamu prysudzili bujny štraf FOTA
U sieradu, 16 listapada, u sudzie Partyzanskaha rajonu razhladałasia sprava Zmitra Daškieviča.
7 listapada padčas akcyi pratestu suprać novaha pomnika Leninu kala Traktarnaha zavoda Zmicier Daškievič razam sa svaimi paplečnikami byŭ zatrymany. Pa słovach Źmitra, pa darozie ŭ RAUS supracoŭniki AMAP žorstka zbivali jaho i ździekavalisia. Na Daškieviča skłali try pratakoły: za «ŭdzieł u niesankcyjanavanaj akcyi», za «chulihanstva» i za «niepadparadkavańnie milicyi».
13:00
Prysud: Źmicier Daškievič atrymaŭ štraf u 50 bazavych (1050 rubloŭ).
Sudździa pryznała vinavatym Daškieviča ŭ paŭtornym na praciahu hoda ŭdziele ŭ niesankcyjanavanym masavym mierapryjemstvie (artykuł 23.34 KaAP RB) i niepadparadkavańni patrabavańniam milicyi (artykuł 23.4).
Źmicier sa svaimi paplečnikami pakinuŭ zału suda da abviaščeńnia prysudu, kab trapić na sud nad Uładzimiram Kondrusiem.
11:10
Pakazańni daje Pavieł Jafremaŭ, kamandzir adzialeńnia AMAP.
«Naŭmysna ŭnosiŭ paniku ŭ natoŭp. My nie ŭmiešvalisia da apošniaha, ale kali pačałasia bojka, vyrašyli jaho zatrymać», — začytvaje z natatnika Jefremaŭ.
Jon kaža, što jany vyratavali Źmitra, bo jaho b tam źbili.
«U nas nie było inšaha vyjścia. My da apošniaha dumali, što ŭsio abydziecca, ale kali b my stajali ŭ baku, nieviadoma, što było b. My vyratavali vaša žyćcio. Vy pryjšli, vykazali svoj punkt hledžańnia, ale vy stvaryli paniku. Kali na vas chtości nakinuŭsia, jaho treba pakarać, tut ja z vami zhodny», — praciahvaje Jefremaŭ.
Daškievič:
«Ja siońnia pryjšoŭ dziela adnaho — pahladzieć na vas i vašych siabroŭ, jakija lubiać smaktać dubinki. Što było ŭ aŭtobusie?»
Jefremaŭ:
«Ja siadzieŭ napieradzie, Źmicier byŭ zzadu. Ja ŭžo nie pamiataju i nie bačyŭ, ci była niejkaja patasoŭka ŭ aŭtamabili pa darozie ŭ RAUS. Ja Źmitra viedaju daŭno. Moža, ja štości i bačyŭ, moža, i była pierapałka słaviesnaja, ale ja hetaha nie pamiataju».
Daškievič:
«Tavaryš Jefremaŭ u samych vyčvarenskich formach nakidvaŭsia na mianie. Fizičny hvałt u ich užo pierasiakaje miažu».
Jefremaŭ:
«Mnie nie zrazumieła, pa jakich maralna-psichałahičnych pryčynach Źmicier kaža takija rečy pra mianie. Kali b my jaho nie vyratavali, to jaho b zabrała chutkaja dapamoha. I kali b ja kahości źbivaŭ, byli b vielmi ciažkija nastupstvy».
Źmicier jašče raz zadaŭ pytańnie, ci tykaŭ jon dubinkaj. Milicyjant spytaŭ, ci razumieje Źmicier, što značyć tykać dubinkaj.
Daškievič: «Nie, vy kankretna adkažycie: vy tykali dubinkaj?»
Jefremaŭ: «Nie».
Daškievič: «U mianie bolš pytańniaŭ da Jefremava niama».
10:55
Vystupaje milicyjant Andrej Leonaŭ, jaki zatrymlivaŭ Daškieviča. Pa słovach aktyvistaŭ, jon biŭ Ramana pa ščokach.
«Daškievič sprabavaŭ spravakavać bojku. Ja pravodziŭ zatrymańnie, kab spynić masavyja biesparadki. Kali ja sprabavaŭ zatrymać Daškieviča, jon schapiŭ mianie za formu», — havoryć Leonaŭ. Jon kaža, što zatrymanyja siadzieli na padłozie i kryčali «fašysty».
Źmicier zajaŭlaje, što ŭ aŭtobusie jaho źbivali Leonaŭ i Jefremaŭ. Milicyjant admaŭlaje. Źmicier papiaredžvaje, što milicyjant pavinien mieć na ŭvazie adkaznaść za iłžeśviedčańnie.
10:40
«Jak tolki pokryva ź Lenina źniali, voś hety tavaryš (Źmicier — red.) vybieh z raściažkaj i staŭ kryčać. Heta nonsans, my ŭ mirnaj krainie žyviem. Ja była ŭ šoku», — daje pakazańni načalnik biuro ideałohii traktarnaha zavoda.
«Vy adkryvajecie pomnik tyranu», — havoryć Źmicier.
«Heta naša terytoryja i naš pomnik. Heta naša histaryčnaja abarona», — kaža śviedka.
«Panie Tamara, ci viedajecie vy, kolki traktaroŭ na składzie staić, pakul vy stavicie pomniki Leninu?» — pytajecca Źmicier.
10:30
Daje pakazańni milicyjant Siarhiej Sielin. Jon havoryć, što byli kryki «hańba» i skoki ŭ bok pomnika. Ale nie viedaje, chto kryčaŭ, bo nie bačyŭ.
«Ja ŭziaŭ cytaty Lenina, a vy kažacie, što adbyłasia akcyja, jakaja nie ŭpisvajecca ŭ asnoŭnaje mierapryjemstva», — adkazvaje Daškievič Sielinu.
10:20
Śviedki Daškieviča kažuć, što ŭ kalidory amapaŭcy vučać kanśpiekty z pakazańniami, jakija jany pavinny dać.
«My pryjšli na dazvolenaje harvykankamam mierapryjemstva. Paśla pikietavańnia nas zatrymali. Kali nas pryvieźli ŭ RAUS, Źmicier užo lažaŭ na padłozie i jaho pinali», — havoryć Siarhiej Palčeŭski.
«Nas pasadzili ŭ sini aŭtobus, Daškieviča pakłali na padłohu. Ramana Hančarova bili pa ščokach i pytalisia, kolki nam płaciać. Jefremaŭ padnosiŭ dubinku da majho tvaru i pytaŭsia: ci viedaješ ty, što heta takoje?» — kaža Arciom Leŭčanka.
Žurnalista «Radyjo Svaboda» vypravadzili z zały suda praz zdymku videa.
10:10
Sudździa prosić paćvierdzić, ci byŭ Daškievič na akcyi. Źmicier raspaviadaje, što prosta vyrašyŭ vykazać niazhodu, tamu ź siabrami razdrukavaŭ cytaty Lenina i ciaham niekalki chvilin pravodziŭ pikietavańnie. Paśla niekalki pradstaŭnikoŭ kamunistyčnych partyj nakinulisia na jaho, a zatym supracoŭniki AMAP panieśli jaho ŭ aŭtobus. Źmicier kaža, što choča spytać u amapaŭcaŭ, dla čaho jany źbivali jaho ŭ aŭtobusie.
Sud admoviŭsia prahladać videazapis, jaki źniali žurnalisty.
10:05
Daškievič chadajničaje, kab sud vioŭsia pa-biełarusku. Sudździa admaŭlaje, pakolki ŭ krainie dźvie dziaržaŭnyja movy.
Sudździa začytvaje abvinavačvańnie. Daškievič kaža, što kiepska razumieje ruskuju movu, ale heta ŭsio chłuśnia.
Daškievič dałučaje śviedkaŭ Palčeŭskaha i Leŭčanku, jakija mohuć raspavieści, jak było nasamreč.
***
Kamientary