Ecolines vybačyłasia pierad 16-hadovaj minčankaj, jakuju vysadzili z aŭtobusa na ŭskrainie Prahi
Mižnarodnaja kampanija Ecolines vybačyłasia pierad biełaruskaj Dyjanaj Kačarhinoj, jakuju 4 listapada vysadzili z aŭtobusa na ŭskrainie Prahi. Ź situacyjaj raźbirałasia Jeŭraradyjo.
A padziei raźvivalisia tak. Uviečary 4 listapada 16-hadovaja minčanka Dyjana Kačarhina siadaje ŭ Prazie ŭ aŭtobus Ecolines, jaki musić davieźci jaje da Varšavy. Adnak praź niekalki chvilinaŭ ściuardesa spyniaje aŭtobus i vysadžvaje dziaŭčynu. Na dumku supracoŭnicy Ecolines, u pašparcie pasažyrki adsutničaje Šenhienskaja viza.
«Jana pabačyła maju brytanskuju vizu i čamuści nie zachacieła hartać pašpart dalej. Niekalki razoŭ paŭtaryła: «Jak vy ŭvohule siudy ŭjechali?» Taksama havaryła pra toje, što buduć prablemy, — raspavajadaje Dyjana Kačarhina. — Aŭtobus spaźniaŭsia, jana vielmi śpiašałasia. I, chacia ŭ pašparcie byŭ sapraŭdny «Šenhien», jaki dziejničaje da maja 2017 hoda, spyniła aŭtobus na ŭskrajku Prahi i vysadziła mianie. Navat nie dała času apranucca».
Dziaŭčyna ŭ šoku. Za siem dzion da zdareńnia jaje vizu pravieryli na biełaruska-polskaj miažy, praź jakuju jana — taksama aŭtobusam Ecolines — zajechała ŭ Šenhienskuju zonu.
«Ja sumiełasia i nie zdoleła ŭpeŭnić ściuardesu dahartać pašpart da majho «Šenhiena», bo jana vielmi cisnuła na mianie. U vyniku daviałosia načavać u siabroŭki ŭ internacie, — praciahvaje Dyjana Kačarhina. — Na nastupny dzień znajšlisia znajomyja, jakija jechali z Čechii ŭ Biełaruś. Im treba było ŭ Homiel, ale jany davieźli mianie dadomu. Što praŭda, daviałosia zrabić adnu načoŭku ŭ Varšavie».
Paśla viartańnia ŭ Biełaruś Dyjana i jaje mama zanieśli skarhu ŭ minski ofis Ecolines.
U im jany zapatrabavali ŭ kampanii prabačeńniaŭ, a taksama kampiensacyi koštu kvitkoŭ i dadatkovych vydatkaŭ, jakija paniesła siamja pasažyrki: heta hrošy na charčavańnie, niezapłanavanuju načoŭku ŭ Varšavie i maralnyja straty. Pa słovach Dyjany, ź imi razmaŭlali niepryjazna. Pretenziju pieranakiravali ŭ litoŭski ofis kampanii — toj rejs, ź jakoha źniali dziaŭčynu, vykonvaŭ litoŭski pieravozčyk.
«Śpiarša jany zajavili, što buduć razhladać skarhu ciaham 30 dzion, — raspaviadaje Dyjana. — Ale, kali pačaŭsia rozhałas u internecie, jany napisali nam paviedamleńnie z prabačeńniami, i paabiacali kampiensavać straty, pra jakija my zajavili. Taksama nam paviedamili, što supracoŭnicu, praź jakuju mianie ssadzili z aŭtobusa, adchilili ad pracy».
U minskim ofisie Ecolines Jeŭraradyjo paćvierdzili, što siamja pasažyrki ŭžo atrymała adkaz na pretenziju. Adnak jaho źmiestu tam nie viedali — taksama jak i ŭ litoŭskim adździaleńni kampanii.
Adnak u łatvijskim ofisie Ecolines, dzie razhladajucca skarhi pasažyraŭ, nam paćvierdzili: incydent u Prazie sapraŭdy byŭ, i kampanija pryznała svaju vinu. «Adkaz adpraŭleny na minułym tydni. Prabačeńni pryniesienyja, vypłačanaja kampiensacyja», — dadali ŭ Ecolines.
Kamientary