Za dva miesiacy da zaviaršeńnia 2016 hoda śpis kampanij, jakija majuć daŭhi pierad biudžetam, praciahvaje razrastacca. Usio bolš u im — viadomych nazvaŭ i brendaŭ.
U «čornym śpisie» Ministerstva pa padatkach i zborach pa Minsku na praciahu hoda było dastatkova šmat kampanij, jakija invieścirujuć u nieruchomaść, zaniatych u budaŭnictvie abo handli, vytvorčaści budmateryjałaŭ. Na 1 listapada hety pieralik papoŭnili niekalki novych kampanij-daŭžnikoŭ.
U ich liku akazalisia dźvie kampanii viadomaha biznesoŭca Alaksieja Vahanava («Łada OMS Enierha» i «Łada OMS-Inžynierynh»), zaniatyja ŭ realizacyi niekalkich znakavych prajektaŭ u žyłoj i haściničnaj nieruchomaści, i niekali adzin ź lidaraŭ rynku pa vytvorčaści suchich budaŭničych sumiesiaŭ «Sarmat Kirujučaja Kampanija», a taksama pradpryjemstva Ivana Burakoŭskaha «Profstandart».
U śpisach dosyć šmat biznesaŭ ź siektaraŭ handlu i pasłuh. Siarod ich kampanii «Zika» (Ihara Zajcava i Aleha Kaściukoviča), «Dalidovič», «Biełatra» Juryja Vojniča, «Dylertorh» Uładzimira Aleksandroviča. Na 1 listapada zastalisia vinnyja biudžetu pradziusarskija centry «Novaja Novaja chvala Biełpradakšn», «Mieha-pradakšn» i arhanizatar džazavych viečaroŭ «La Ratušy» mižnarodny sacyjalna-ekanamičny fond «Ideja». Pa niejkich pryčynach u «čorny śpis» trapiŭ i narodny futbolny kłub, adno z adkryćciaŭ ciapierašniaha futbolnaha pieršynstva Biełarusi, — «Krumkačy».
Siarod vytvorcaŭ u minskaj padatkovaj inśpiekcyi zastalisia pytańni da Minskaha zavoda biezałkaholnych napojaŭ, «Akvatrajpła» Juryja Čyža i «Biełvinhrup» Siarhieja Ciuškieviča i Viktara Pavietkina.
Z rehijanalnych daŭžnikoŭ adznačym Asipovicki vahonabudaŭničy zavod i adzin ź siamiejnych chołdynhaŭ Zuchavickich — «ZKS Fłahman».
Kamientary