Hienieralny sakratar NATA Jens Stołtenbierh nie pahadziŭsia z pazicyjaj Maskvy, jakaja nazyvaje praces uzmacnieńnia hrupoŭki NATA va Uschodniaj Jeŭropie pravakacyjaj.
Pra heta jon zajaviŭ na lekcyi ŭ Oksfardskim univiersitecie, paviedamlaje RBK. Videa lekcyi pryvodzić aficyjny kanał NATO na YouTube.
«Nie, ja nie razumieju, kali ŭ Rasii vykazvajuć mierkavańnie, što pašyreńnie NATA ŭ Centralnaj i Uschodniaj Jeŭropie — heta pravakacyja», — skazaŭ Stołtenbierh. Hienieralny sakratar NATA «hłyboka pierakanany» ŭ tym, što lubaja nacyja maje prava vybirać «svoj šlach». «Heta nie NATA pašyrajecca, a Polšča, Estonija, Łatvija, Litva, Vienhryja sami vykazali žadańnie dałučycca da aljansu», — patłumačyŭ hienieralny sakratar. Stołtenbierh nazvaŭ «niemahčymym» admovu hetym krainam u padtrymcy NATA praz toje, što Rasii heta «nie spadabajecca».
Jon padkreśliŭ, što ni Rasija, ni inšyja krainy nie majuć prava vyrašać los susiednich dziaržaŭ. «Rasii varta było b rassłabicca i pryniać toje, što susiedzi mohuć sami vybirać svoj šlach», — skazaŭ Stołtenbierh. Pry hetym jon adznačyŭ, što NATA «pakidaje adkrytaj mahčymaść palityčnaha dyjałohu z Rasijaj».
Hienieralny sakratar taksama nazvaŭ «hałoŭnuju pryčynu» spynieńnia adnosin pamiž NATA i Rasijaj. «Hałoŭnaja pryčyna taho, čamu jany źmianilisia, heta aneksija Kryma. Vykarystańnie vajennaj siły suprać susieda nieprymalna. Tamu my [NATA] pavinny byli adkazać. I my adkazali na heta pavieličeńniem našaj vajennaj prysutnaści na ŭschodzie, adpraviŭšy vyrazny sihnał, što my hatovyja abaraniać usich našych sajuźnikaŭ suprać čaho-niebudź padobnaha, što adbyłosia va Ukrainie», — padkreśliŭ Stołtenbierh.
Raniej, 7 listapada, Stołtenbierh zajaviŭ, što sotni tysiač vajskoŭcaŭ NATA buduć pieraviedzieny na ŭzmocnieny režym niasieńnia słužby na fonie napružańnia, jakoje ŭsio bolš narastaje ŭ adnosinach z Rasijaj. Kamandavańnie NATA choča padrychtavać značnuju kolkaść vajennasłužačych dla strymlivańnia «rasijskaj ahresii», adznačaŭ hienieralny sakratar NATA.
Pres-sakratar prezidenta Rasii Dźmitryj Piaskoŭ u intervju Associated Press 12 listapada zajaviŭ, što Rasija nie adčuvaje siabie ŭ biaśpiecy, kali «siły NATA stanoviacca bolš i bolš i bližej i bližej da miežaŭ Rasii». Tady ž jon adznačyŭ, što spynieńnie ekspansii NATA pryviała b da adnaŭleńnia daviernych adnosin pamiž Rasijaj i ZŠA padčas prezidenctva ZŠA Donalda Trampa.
Raniej, 21 listapada, Pucin zajaviŭ, što Rasija «pavinna pradprymać kontrmiery» u adkaz na dziejańni NATA. Jon rastłumačyŭ, što nie zaŭsiody razumieje «łohiku našych partnioraŭ» i ŭ jaho składajecca ŭražańnie, što zachodnim krainam nieabchodny «źniešni vorah» dla padtrymańnia dyscypliny ŭ svaich šerahach. «Pry ŭsich aściarohach Iran na heta nie vielmi ciahnie», — skazaŭ Pucin.
Kamientary