Suprać źniavolenaha Andreja Bandarenki zaviali novuju kryminalnuju spravu za «złosnaje niepadparadkavańnie»
14 listapada pa inicyjatyvie administracyi turmy №4 Mahiloŭskim mižrajonnym adździełam Śledčaha kamiteta była zaviedzienaja kryminalnaja sprava pa č. 2. art 411 Kryminalnaha kodeksa (złosnaje niepadparadkavańnie patrabavańniam administracyi papraŭčaj ustanovy) suprać źniavolenaha zasnavalnika pravaabarončaj ustanovy «Płatform inavejšn» Andreja Bandarenki. Pa hetym artykule jamu moža pahražać źniavoleńnie terminam da 2 hadoŭ.
Pieršaje śledčaje dziejańnie, na jakim prysutničaŭ dziažurny advakat, adbyłosia 17 listapada. Andrej Bandarenka admoviŭsia davać pakazańni, a taksama ad pasłuh dziažurnaha advakata. Jahonyja intaresy dalej budzie pradstaŭlać advakat, ź jakim jon pracuje na hety čas.
Na dadzieny momant pravaabaroncam nieviadoma, što stała padstavaj dla ŭzbudžeńnia kryminalnaj spravy ŭ adnosinach da jaho.
30 listapada Andreja Bandarenku naviedaje jahony advakat. U hety ž dzień u Mahiloŭskim abłasnym sudzie adbudziecca kasacyjny razhlad dźviuch skarhaŭ Bandarenki na vyniesienyja jamu administracyjaj papraŭčaj ustanovy spahnańni.
Varta adznačyć, što ŭ sudzie Leninskaha rajona Mahilova 14 listapada padčas sudovaha razhladu skarhi Bandarenki na spahnańnie, vyniesienaje administracyjaj turmy №4, pradstaŭnik turmy navat nie ŭzhadvaŭ ab tym, što była zaviedzienaja kryminalnaja sprava.
Andrej Bandarenka — były kiraŭnik pravaabarončaj arhanizacyi «Płatform inavejšn», jakaja zajmałasia manitorynham miescaŭ źniavoleńnia. U 2014 hodzie jaho pryznali vinavatym u chulihanstvie, złosnym chulihanstvie i asabliva złosnym chulihanstvie ŭ dačynieńni da troch hramadzian i asudzili na try hady kałonii ŭzmocnienaha režymu. Na volu jon pavinien vyjści 31 sakavika 2017 hoda.
Kamientary