Pieramovy kiraŭnikoŭ MZS «narmandskaj čaćviorki» ŭ Minsku nie prynieśli praryvaŭ

Pieramovy doŭžylisia bolš za try hadziny. Łaŭroŭ adznačyŭ, što vykanańnie minskich damoŭlenaściaŭ buksuje, niahledziačy na «tuju ŭvahu, jakaja nadajecca kiraŭnikami čatyroch krain». Pavodle jaho słoŭ, na pracoŭnym uzroŭni nie ŭdajecca ŭzhadnić navat paśladoŭnaść zachadaŭ i ŭ śfiery biaśpieki, i ŭ śfiery palityčnych reformaŭ.

Łaŭroŭ padkreśliŭ, što havorka idzie pra zakon ab asablivym statusie asobnych rajonaŭ Danbasa i jaho zamacavanni ŭ Kanstytucyi va Ukrainie, a taksama praviadzieńni miascovych vybaraŭ. «Usie hetyja reformy my ŭviazvajem z zachadami ŭ śfiery biaśpieki», — skazaŭ jon.

Pavodle słoŭ kiraŭnika rasijskaha źniešniepalityčnaha viedamstva, častka ciažkich uzbrajeńniaŭ, jakija pavinny byli być adviedzieny, pastajanna viartajucca na liniju sudakranańnia. Spasyłajučysia na vysnovy śpiecyjalnaj manitorynhavaj misii ABSIE, jon zajaviŭ, što «takich parušeńniaŭ u razy bolš z boku Ukrainy».

Na siońniašnich pieramovach baki taksama abmiarkoŭvali humanitarnyja i ekanamičnyja pytańni. Pavodle słoŭ Łaŭrova, Rasija padtrymlivaje zabieśpiačeńnie dostupu pradstaŭnikoŭ Čyrvonaha Kryža da ŭsich zatrymanych pa abodva baki linii sudakranańnia, a taksama adnaŭleńnie vodazabieśpiačeńnia ŭ zonie kanfliktu.

Jon taksama zajaviŭ, što siońnia niama nieabchodnaści raźmiaščać u zonie kanfliktu vajenizavanuju hrupu ABSE i heta pytańnie na sustrečy nie abmiarkoŭvałasia.

U svaju čarhu ministr zamiežnych spraŭ Ukrainy Pavieł Klimkin na svajoj pres-kanfierencyi taksama adznačyŭ, što kazać pra sur`ioznyja vyniki siońniašniaj sustrečy nielha, ale padkreśliŭ, što spadziajecca na niekatoryja zruchi pa humanitarnych pytańniach.

U pryvatnaści, skazaŭ Klimkin, ukrainski bok praciahvaje nastojvać na svabodnym dostupie pradstaŭnikoŭ Čyrvonaha Kryža i mižnarodnych humanitarnych arhanizacyj da ŭkrainskich vajennych i cyvilnych asob, jakija ŭtrymlivajucca na terytoryi Danbasa. Mienavita z hetaha pytańnia ŭkrainski bok pačaŭ pieramovy.

Akramia taho, ukrainski bok nastojvaje na vyzvaleńni zatrymanych asob i na svabodnym dostupie na terytoryju šerahu rajonaŭ Danieckaj i Łuhanskaj abłaściej misii ABSIE.

Klimkin spadziajecca, što pytańnie z dostupam Čyrvonaha Kryža i mižnarodnych humanitarnych arhanizacyj da pałonnych udasca vyrašyć u najbližejšy čas, a taksama raźličvaje na vyniki ŭ pieramovach pa abmienie pałonnymi.

Jon padkreśliŭ, što na siońniašnich pieramovach ukrainski bok zajaviŭ ab zhodzie «na lubuju opcyju» ŭ pytańni abmienu pałonnymi.

Klimkin taksama paviedamiŭ, što dyskusija ab «darožnaj karcie» pa vykanańni minskich pahadnieńniaŭ na pieramovach była karotkaj, bo nie ŭdajecca dasiahnuć zhody z rasijskim bokam pa klučavych pytańniach. Pavodle słoŭ Klimkina, heta dyskusija budzie praciahnutaja ŭ roznych farmatach.

• 0
• 0
• 0
• 0
• 0