Ministerstva finansaŭ Biełarusi rychtuje prapanovy pa libieralizacyi ŭmoŭ haspadarańnia na strachavym rynku. Adpaviedny prajekt ukaza prezidenta prachodzić stadyju ŭzhadnieńnia, paviedamiŭ pieršy namieśnik ministra finansaŭ Maksim Jermałovič u svaim artykule, apublikavanym u apošnim numary časopisa «Finansy, učiet, audit», jaki vydajecca Minfinam.
«Ministerstvam finansaŭ padrychtavany šerah dadatkovych prapanoŭ, nakiravanych na palapšeńnie ŭmoŭ viadzieńnia strachavoha biźniesu, — piša Jermałovič. — U pryvatnaści, inicyjavanaja ideja pa admovie ad abaviazkovaha ŭzhadnieńnia praviłaŭ pa vidach dobraachvotnaha strachavańnia (ź pierachodam na paviedamlalny pryncyp). Nieŭzabavie adbudziecca i admiena narmatyvu raschodaŭ na viadzieńnie spravy strachavoj arhanizacyi i jaje abaviazki pa raźmiaščeńni i ŭliku srodkaŭ strachavych reziervaŭ na śpiecyjalnych rachunkach».
Na dumku pieršaha namieśnika ministra finansaŭ, strachavy rynak Biełarusi robicca jašče bolš pryvabnym dla zamiežnych inviestycyj. Siońnia na im pracujuć 19 arhanizacyj, 8 ź jakich — z udziełam zamiežnaha kapitału, kanstatuje ŭ artykule pieršy namieśnik ministra finansaŭ.
«Pavyšeńnie ŭvahi da našaj krainy nievypadkovaje. Abjom premij profilnych kampanij ŭ 2016 hodzie dasiahnuŭ 520 młn dołaraŭ — heta na 15% bolš, čym u 2010 hodzie. Pry hetym uzrovień strachavych vypłat u ahulnaj sumie premij skłaŭsia ŭ pamiery 57%, što na 3% nižej, čym piać hadoŭ tamu», — padkreślivaje aŭtar.
Maksim Jermałovič taksama źviartaje ŭvahu i na rost prybytku strachavych kampanij. «Sukupny abjom čystaha prybytku, atrymanaha siektaram u 2015 hodzie, skłaŭsia ŭ pamiery bolšym za 92 młn dołaraŭ, što na 61 młn dołaraŭ, abo ŭ 3 razy, vyšej za anałahičny vynik 2010 hoda», — kanstatavaŭ pieršy namieśnik ministra finansaŭ.
Jak paviedamlałasia raniej, u listapadzie Minfin pryniaŭ rašeńnie ab stvareńni pry ministerstvie hramadska-kansultatyŭnaha savieta pa pytańniach strachavańnia. Saviet źjaŭlajecca daradčym i kansultatyŭnym orhanam, jaki ŭdzielničaje ŭ hramadskich abmierkavańniach prajektaŭ narmatyŭnych pravavych aktaŭ pa pytańniach strachavańnia, što mohuć akazvać istotny ŭpłyŭ na ŭmovy pradprymalnickaj dziejnaści.
U listapadzie ŭ Biełarusi taksama była pryniataja respublikanskaja prahrama raźvićcia strachavańnia na 2016—2020 hady, jakaja praduhledžvaje vyraŭnoŭvańnie ŭmoŭ haspadarańnia dla dziaržaŭnych i pryvatnych strachavych kampanij.
Kamientary